Borgin slítur vina­borgar­sam­starfi við Moskvu

Þetta kemur fram í tilkynningu frá Reykjavíkurborg. Þar segir að Dagur B. Eggertsson borgarstjóri hafi átt fund með borgarstjóra Lviv þann 20. apríl síðastliðinn og sendiherra Úkraínu á Íslandi þann 16. júní síðastliðinn þar sem þessi mál voru rædd. 

„Í framhaldi af umræðum í borgarráði sl.vor hefur borgarstjóri fundað með utanríkisráðherra um málið og utanríkisráðuneytið gerir ekki athugasemdir við tillögu um slit á vinaborgarsamstarfi.“

Að ráðgjöf borgarlögmanns verði leitað viðbragða borgarstjórnar Moskvu áður en slit, á vinaborgarsamstarfi og ofangreindum samningi, verða formlega orðin.

Legið niðri síðan 2013

Dagur sagði í samtali við Vísi í mars síðastliðinn að hann útilokaði ekki að vinasamstarfinu yrði slitið. Benti hann þá einnig á að samband Reykjavíkurborgar við Moskvu hefði raunar legið niðri árum saman. 

Í ágúst 2013 vakti þannig athygli þegar borgarráð samþykkti tillögu Jóns Gnarr, þáverandi borgarstjóra, um endurskoðun á samstarfssamningi Reykjavíkurborgar og Moskvu. Var tilefnið sú þróun sem hafði átt sér stað í málefnum hinsegin fólks í Rússlandi.

Fordæmdi árásina

Í tilkynningu frá borginni nú segir að minnt sé á að borgarstjórn hafi sent frá sér eftirfarandi einróma ályktun vegna innrásarinnar í Úkraínu þann 1. mars sl.:

„Borgarstjórn Reykjavíkur fordæmir harðlega innrás Sambandslýðveldisins Rússlands í Úkraínu og lýsir samstöðu og stuðningi við fólkið í Úkraínu. Borgarstjórn skorar á ríkisstjórn Rússlands að draga hersveitir sínar til baka, lýsa yfir vopnahléi og koma á friði þegar í stað.  Innrásin í Úkraínu er ólögleg og ómannúðleg – og með henni er friður í Evrópu rofinn. Borgarstjórn lýsir samstöðu með Kyiv, Kharkiv, Kherson og öðrum úkraínskum borgum og  landsvæðum sem nú sæta árásum. Jafnframt lýsir borgarstjórn samstöðu með íbúum sem  neyðast til að flýja heimili sín eða berjast varnarbaráttu við ofurefli.  Innrás sem þessi gengur gegn öllum gildum borgarstjórnar Reykjavíkur og hvetjum við því  ríkisstjórn Íslands og stjórnir vinaríkja til að taka á móti flóttafólki og veita allan þann stuðning  sem þarf til að hjálpa úkraínsku þjóðinni að komast í gegnum þessar hörmungar.  Reykjavíkurborg mun ekki láta sitt eftir liggja í þeim efnum og lýsir sig tilbúna til að taka á móti fólki á flótta.“