Horfa þurfi á tæki­færin og mögu­leikana sem felist í því að taka á móti er­lendu vinnu­afli

Veruleg þörf er á erlendu vinnuafli hér á landi og viðbúið að sú þörf muni aðeins aukast á næstu árum og áratugum. Framkvæmdastjóri Samtaka atvinnulífsins hefur meðal annars gagnrýnt að það sé of flókið og tafsamt að fá fólk hingað í vinnu. Í raun þyrfti að leggja út rauðan dregil fyrir fólk sem hingað vilji koma.

Guðmundur Ingi Guðbrandsson, félags- og vinnumarkaðsráðherra, segir starfshóp á vegum ráðuneyti hans, dómsmálaráðuneytisins og háskóla-, nýsköpunar- og iðnaðarráðuneytisins, vera með málið til skoðunar.

„Í þessu tilfelli erum við að tala um samspil milli dvalarleyfa og atvinnuleyfa í þeim tilgangi að geta auðvelda fólki sem er þá utan EES svæðisins að koma hingað og vinna og ég vonast bara til þess að við náum að stíga mikilvæg skref í þá átt á næstu misserum,“ segir Guðmundur Ingi.

Jón Gunnarsson dómsmálaráðherra sagðist í samtali við fréttastofu í vikunni fylgjandi slíku skrefi en það væri á á hendi félagsmálaráðherra að koma með frumvarp um þá hlið mála. Guðmundur Ingi vill ekki fullyrða um hvort hann muni leggja fram slíkt frumvarp og segir að bíða þurfi og sjá hvað kemur úr vinnu starfshópsins.

Sérstök ráðherranefnd um málefni innflytjenda vinni sömuleiðis að því að samhæfa verkefni milli ráðuneyta.

„Ég finn að eftir að sú ráðherranefnd tók til starfa núna í vor að þá erum við að stíga skrefin hraðar í þeim málum sem að heyra undir þetta víðfeðma svið. Við erum til dæmis að setja í gang núna heildarstefnumótun í málefnum innflytjenda og flóttafólks sem við höfum ekki átt til,“ segir hann.

Gríðarlega mikilvægt sé að innflytjendur geti aðlagast íslensku samfélagi með farsælum hætti.

„Með þessari vinnu erum við þá að vinna eiginlega gegn því að hér verði til tvær þjóðir í landinu, annars vegar fólk sem er kannski af íslensku bergi brotið og er að fá betur launuðu störfin, meðan að fólk sem að er af erlendu bergi brotið, innflytjendurnir okkar sem að eru þá kannski meira að fara í störf sem að borga minna,“ segir Guðmundur Ingi.

„Við eigum að horfa á tækifærin og möguleikana sem að felast í því að geta tekið vel á móti fólki sem að hingað kemur og nýtt allan þann kraft sem að raunverulega býr í því fólki,“ segir hann enn fremur.