Alfreð og Sævar byrjuðu báðir í jafntefli við Álaborg

Lyngby komst yfir rétt fyrir leikhlé þegar að frábær fyrirgjöf Adam Sørensen frá vinstri rataði beint á Kasper Jørgensen sem tók boltann niður og kom honum framhjá Josip Posavec í marki Álaborgar.

Jöfnunarmark Álaborgar kom strax eftir hálfleik og var afar klaufalegt fyrir Lyngby. Mads Kikkenborg, markvörður Lyngby, reyndi þá erfiða sendingu sem fór beint á Allan Sousa, leikmann Álaborgar, sem þakkaði fyrir sig og setti boltann í netið og þar við sat.

Lyngby er því enn án sigurs og er í neðsta sæti dönsku úrvalsdeildarinnar með þrjú stig eftir níu leiki. Álaborg er einu sæti fyrir ofan með níu stig.

Næsti leikur Lyngby er gegn Aroni Elís Þrándarsyni og félögum í OB næsta sunnudag.