Íslenskt fyrirtæki hluti af herferð Meta

Í fyrradag kynnti Meta ný sýndarveruleikagleraugu sýn, Meta Quest Pro. Gleraugun eru þau þriðju sem koma frá Meta en fyrirtækið hefur sett mikla vinnu í þróun og hönnun Quest-línunnar. 

Í kynningarmyndbandinu fyrir Quest Pro-gleraugun er sýnt frá nokkrum forritum sem hægt er að nota með gleraugunum. Fyrsta forritið var hið íslenska forrit Arkio. Arkio er eina fyrirtækið sem einbeitir sér að arkitektúr og rýmishönnun fyrir sýndarveruleika. 

Arkio var stofnað á Íslandi árið 2017 og er í dag með tíu starfsmenn, þrjá hérlendis og sjö erlendis. Fyrirtækið hefur frá stofnun einbeitt sér að erlendum mörkuðum. Þeirra stærsti notendahópur er í Bandaríkjunum. 

Hilmar Gunnarsson er stofnandi og eigandi Arkio. Í samtali við fréttastofu segir hann það vera mikinn heiður að Arkio sé í auglýsingunni. Hann og teymið hjá Arkio hafa unnið náið með Meta síðustu sex mánuði til að þróa forrit þeirra í nýju gleraugunum. 

Meðal tækifæra í nýju gleraugunum er að hægt er að blanda saman sýndarveruleika og raunveruleika þegar verið er að hanna arkitektúr. Það þýðir að fólk getur verið inni í sýndarveruleikanum en liðið eins og það sé að hanna og breyta í raunveruleikanum. 

„Það er ekki bara það að þú getir verið að vinna í sýndarveruleika með þrívíð módel af byggingum og hannað þau, heldur geturu núna bókstaflega verið í raunveruleikanum og breytt honum. Þú getur til dæmis staðið á byggingasvæði og séð byggingu fyrir þér í sínu umhverfi eins og hún mun raunverulega líta út. Eða ef þú vilt prófa að opna vegg, þá getur þú opnað hann og séð í gegnum hann, labbað upp að honum og gægst inn. Þetta eru möguleikar sem hefur ekki verið hægt að nýta áður,“ segir Hilmar.

Með þessum blandaða veruleika er Arkio að gera eitthvað sem hefur ekki verið hægt áður. Fólk getur í raun og veru breytt raunveruleikanum inni í sýndarveruleika. Ég gæti skoðað hvernig það væri í raun og veru ef ég myndi setja upp nýja eldhúsinnréttingu. Séð hvernig útsýnið væri ef ég myndi stækka stofugluggann. Líkt og Hilmar segir, þá er hægt að upplifa rými mun betur ef hægt er að ganga í gegnum þau í staðinn fyrir að horfa á þau á tölvuskjá. 

Stærri arkitektúrstofur, hönnuðir og verkfræðingar munu líka geta nýtt sér tæknina þegar farið er í dýrar framkvæmdir. 

„Það er magnað að það sé enn þann dag í dag, þegar þessi tækni er í boði, að það sé verið að fara í dýrar framkvæmdir, byggja dýrar byggingar, án þess að prófa að labba í gegnum þær fyrst. Þú getur ímyndað þér öll mistökin sem eru gerð, bæði á hönnunarstiginu þar sem fólk heldur að það viti hvernig eitthvað lítur út en það áttar sig ekki alveg á því, eða þegar það er byrjað að framkvæma og þarf að gera breytingar. Mörgum af þessum mistökum er hægt að afstýra með því að prófa þessar byggingar áður,“ segir Hilmar.

Í dag er allt hannað og sníðað á flötum tölvuskjá, þrátt fyrir að flestir geri þrívíddarkynningar. Þá eru hlutir kynntir með þrívíddarmyndböndum, en enn á flötum skjá. Hilmar segir muninn á því og að nota Arkio vera eins og að sýna einhverjum mynd af París eða bjóða honum að fara til Parísar og labba upp að Eiffel-turninum. 

Hver sem er getur keypt Meta Quest Pro gleraugun frá og með 25. október en verðmiðinn er ekki fyrir alla. Ein gleraugu kosta 1.500 dollara, rúmlega 216 þúsund krónur. Búist er við því að verðið lækki hægt og rólega með næstu útgáfum gleraugnanna.