Þrír berjast við goðsögnina Guðjón um sæti í úrslitum

Guðjón, sem er Grindvíkingur, er sannkölluð goðsögn í píluheiminum enda afar sigursæll hér á landi á árum áður. 

Auk Íslandsmeistaratitla í einmenningi hefur hann einnig oft orðið Íslandsmeistari í tvímenningi og unnið fleiri titla. Síðasti Íslandsmeistaratitill hans í einmenningi kom hins vegar fyrir fjórtán árum.

Guðjón keppir ásamt þremur öðrum um eitt laust sæti á úrslitakvöldinu sem fram fer í desember. Áður hafa þeir Arnar Geir Hjartarson og Vitor Charrua tryggt sér sæti á úrslitakvöldinu þar sem fjórir keppendur munu berjast um sigurinn.

Guðjón mun í kvöld keppa við þá Björn Steinar Brynjólfsson, Sigurð Tómasson og Karl Helga Jónsson. 

Björn, sem er fertugur, er líkt og Guðjón frá Grindavík, fyrrverandi körfuknattleiksmaður og þjálfari.

Sigurður, eða Siggi Tomm, er 49 ára kennari frá Akranesi sem fyrst prófaði pílukast árið 1987 en hellti sér svo aftur út í íþróttina árið 2019, og Karl Helgi er svo 57 ára kokkur hjá Grillvagninum sem æft hefur pílukast í nokkur ár.

Keppnin er í beinni útsendingu á Stöð 2 Sport í kvöld og hefst útsendingin klukkan 20.