Myndaveisla: „Mannlegur harmleikur og hugleiðing um réttlæti og hefnd“

Blaðamaður heyrði í Skúla og fékk að heyra meira um sköpunarferlið:

Hvenær hófst ferlið að skrifa bókina?

Ég byrjaði á henni í desember 2018 en var þá búinn að vera með vísi að hugmyndinni í huga um skeið. Á þessum tíma bjó ég í Jórdaníu og vann fyrir Sameinuðu þjóðirnar og því gengu skrifin hægt. Ég lauk svo við handritið hér heima haustið 2021.

Hvernig myndir þú lýsa þínu sköpunarferli?

Bæði Stóri bróðir og bók númer tvö, sem er nokkurn veginn tilbúin, byrjuðu sem „hvað ef?“ spurningar. Þetta voru agnarsmáar hugmyndir sem ég velti svo fyrir mér og bætti kjöti á beinin. Fljótlega vissi ég hvert ég stefndi með sögurnar og þegar á líður leiðir söguþráðurinn mann í mark, þetta skrifar sig eiginlega sjálft. 

Aðalmálið er að gefa sér tíma, setjast niður og skrifa.

Hvaðan kom hugmyndin?

Það má segja að hún komi víða að. Þjóðfélagsumræðan hér á landi og erlendis var mér efniviður, hvernig hún pólaríserast stundum og allt er málað í svörtu og hvítu. Ég notaði mikið bakgrunn minn sem blaðamaður og ýmsar hugleiðingar um glæpi og refsingu úr laganámi mínu, án þess að þetta sé sérstaklega heimspekileg saga. Að auki sótti ég innblástur í ýmsar bækur og ekki síður kvikmyndir.

Við nánari umhugsun kom hugmyndin eiginlega ekki víða að, hún kom til mín úr öllum áttum.

Hvernig myndir þú lýsa sögunni?

Ætli hún sé ekki ráðgáta og spennutryllir, í sirka jöfnum hlutföllum. Hún er líka mannlegur harmleikur og hugleiðing um réttlæti og hefnd. 

Fyrst og fremst er Stóri bróðir þó bara glæpasaga, krimmi og reyfari.

Hvað er framundan?

Aðallega það að koma Stóra bróður á framfæri og koma bókinni á siglingu í jólabókaflóðinu. Ég held að þetta sé saga sem fari vel í landann ef hann er til í að gefa nýjum höfundi séns.

Svo þarf að klára handritahandrit aðð að annarri bókinni. Drápa, útgefandinn minn, lofar því innan á kápunni á Stóra bróður að næsta bók komi út haustið 2023. Við látum það standast.

Hér að neðan má sjá fleiri myndir frá útgáfu bókarinnar: