Íbúar í Vogahverfi beðnir um að skoða stigaganga og geymslur

Síðast er vitað um ferðir Friðfinns síðdegis á fimmtudaginn síðasta þegar hann fór frá Kuggavogi í Vogahverfinu. Hann er 42 ára gamall, klæddur í gráa peysu með Boss merki og í gráum joggingbuxum. Friðfinnur er 1,82 á hæð, grannvaxinn, með brúnt hár og alskegg.

Efnt var til umfangsmikillar leitar í Vogahverfinu í gær. Lögregla og björgunarsveitir gengu um svæðið og notuðu dróna auk þess sem leitað var úr lofti í þyrlu Landhelgisgæslunnar.

Lögregla hefur beðið íbúa í hverfinu um að skoða nærumhverfi sitt, til dæmis geymslur, stigaganga og garðskúra. Þá eru þeir sem eiga autt húsnæði í hverfinu beðnir um að skoða slíka staði.

Leit hófst að nýju í morgun

Ásgeir Þór Ásgeirsson yfirlögregluþjónn segir fáar vísbendingar hafa borist og engar sem hafa skilað árangri. Leit hófst að nýju í morgun og að sögn Ágeirs verður hún nokkuð umfangsmikil líkt og í gær á þeim stutta tíma sem dagsbirtu nýtur við. Hann segir svæðið nokkuð yfirgripsmikið þar sem mikið er um nýbyggingar og yfirgefnar byggingar sem þarf að skoða.

Þeir sem geta gefið upplýsingar um ferðir Friðfinns eru beðnir um að hafa samband við lögreglu í síma 112.