Úrslitakvöldið í Úrvalsdeildinni í pílukasti er á laugardag og sama kvöld verður Stjörnupílan haldin í fyrsta skipti, þar sem frægir Íslendingar spila með bestu pílukösturum landsins. Það er því vert að kafa betur í liðin sem taka þátt, sem og þá fjóra keppendur sem freista þess að vinna Úrvalsdeildina í beinni útsendingu frá Bullseye á Stöð 2 Sport.
Dagskráin á laugardag
20.00-22.00 Úrslit Úrvalsdeildar (Bein útsending)
22.00-00.00 Stjörnupílan (Bein útsending)
Reglur í Stjörnupílunni verða nánast hefbundnar þar sem spilaður verður 501 tvímenningur. Reglubreytingar verða þannig að fagmennirnir þurfa að hitta í tvöfaldan reit í lokin til að vinna legg en þjóðþekktu áhugamennirnir þurfa bara að hitta í þann reit sem hentar til að klára legginn, sem gefur þeim því smáforgjöf.
Í gær og í fyrradag höfum við kynnst fjórum liðum og nú er komið að því að skoða tvö lið til viðbótar, og þá sérstaklega einn þeirra fjögurra keppenda sem verða einnig á úrslitakvöldi Úrvalsdeildarinnar.
Hörður Þór Guðjónsson er 38 ára gamall Grindavíkingur og spilar fyrir Pílufélag Grindavíkur. Hörður starfar hjá Fiskeldi Samherja og hefur stundað pílu síðustu 5 ár. Hörður hefur sigrað jólamót Stöðvar 2 Sport og er einnig í efstu deild á Íslandi í pílu.
Hörður byrjaði seint að kasta pílu en fyrir þá sem til hans þekkja ætti það að koma smá á óvart þar sem faðir hans Guðjón Hauksson er margfaldur Íslandsmeistari í pílu og eignaði sér senuna til margra ára. Guðjón faðir hans á einnig þann heiður að hafa spilað við Peter Wright en það var nú áður en hann varð eitt stærsta nafn í pílu. Hörður fékk viðurnefnið „Sá rólegi“ þegar Henry Birgir og Stefán Árni drógu í lið fyrir Stjörnupíluna en þannig vill til að makkerinn hans er andstæðan við rólegt.
Stuðboltinn Eva Ruza verður einmitt með Herði í liði. Eva er skemmtikraftur, blómaskreytingakona, stjörnufréttakona og er ein af þekktustu veislustjórum landsins þar sem hún starfar einmitt mikið með öðrum keppanda í mótinu. Eva er þekkt fyrir líflegan persónuleika og ætti að vera mikil stemning þegar hún stígur á svið ásamt DJ Khaled.
Alexander Veigar er enn einn Grindvíkingurinn sem stígur á sviðið. Alexander er 18 ára framhaldsskólanemi og hefur stundað pílu í tæp 5 ár. Alexander er eflaust ein af vonarstjörnum íslands í pílu þar sem hann hefur orðið þrisvar Íslandsmeistari unglinga.
Við hentum nokkrum laufléttum spurningum á Alexander.
Hraðaspurningar fyrir Alexander Veigar
Fyrsta mótið í pílukasti?
Íslandsmót unglinga 2016
Besti árangur?
Íslandsmeistari unglinga 3 ár í röð
Hvaða lag viltu heyra áður en þú kastar?
Flashing lights með Kanye West
Nám eða vinna?
Íþrotta og lýðheilsu braut í Fjölbrautaskóla Suðurnesja
Uppáhalds matur?
Önd í pönnuköku
Drauma mótherji?
Phil Taylor
Uppáhalds íþrótt utan pílu?
Körfubolti
Hver af áhugamönnunum mun standa sig best í Stjörnupílunni?
Hjálmar Örn
Nefndu óvenjulega staðreynd um þig?
Er í skóstærð 49,5
Hvað myndiru gera við pening sem frúin í Hamborg gaf þér?
Fara til útlanda
Pabbinn þetta kvöld mun standa við hlið Alexanders og er það skemmtikrafturinn, samfélagsmiðlastjarnan og hvítvínskonan Hjálmar Örn.
Hjálmar er fæddur og uppalinn í River Town (Árbæ) eins og hann kallar það og er gallharður Fylkismaður. Hjálmar birtist fyrst á símum landsmanna og var þar mikið að vinna með nokkra karaktera og einn þeirra sló rækilega í gegn og er enþá mjög vinsæll og er það Hvítvínskonan.
Árið 2018 steig hann sín fyrstu skref á hvíta tjaldinu og lék einmitt þar með Agli Ploder, öðrum keppanda í Stjörnupílunni, í myndinni Fullir Vasar. Hjálmar var einnig á skjánum hjá landsmönnum ásamt Gumma Ben í þáttunum Þeir tveir, sem voru í sýningu á Stöð 2. Hjálmar hefur verið með miklar yfirlýsingar um sigur í mótinu og ætti þrefaldur Íslandsmeistari unglinga að aðstoða við það.
