Betur fór en á horfðist í Hafnar­firði

Í færslu Slökkviliðs höfuðborgarsvæðisins á Facebook segir að tekist hafi að slökkva eldinn og klára öll verkefni á vettvangi á innan við tveimur klukkustundum. Líkt og Vísir greindi frá í gærkvöldi var allt tiltækt lið kallað út.

Það var þó ekki það eina sem slökkviliðsmenn gerðu í gær, farið var í fimm útköll á dælubílum, verkefnum þar sem reykskynjarar fóru í gang vegna eldamennsku, vatntjóni og umferðarslysum var sinnt.

Þá voru verkefni vegna sjúkraflutnings 103 talsins, þar af fjörutíu forgangsverkefni og 27 eftir miðnætti. Sjúkraflutningar gengu margir hverjir hægt vegna ófærðar.