Börnum sagt að redda sér sjálf eftir af­lýsingu flugs

Börn Fannýar Goupil Thiercelin, sautján ára stálp og fimmtán ára stelpa, ætluðu sér að fara til Frakklands að verja jólahátíðinni með stórfjölskyldu sinni. Fjölskyldan er búsett á Húsavík en krakkarnir höfðu fengið inni hjá vinkonu Fannýar í Reykjavík.

Þaðan tóku þau rútu eldsnemma í morgun með flugrútu Reykjavík Excursions. Rútuferðin lengdist allverulega og varð á endanum heilar fimm klukkustundir. Á meðan á rútuferðinni stóð barst tilkynning um að flugi krakkanna hefði verið aflýst, sem og flestra í rútunni. Þó voru um það bil fimm farþegar hverra flugi hafði ekki verið aflýst og því var ekki hægt að snúa rútunni við.

Þegar krakkarnir komu á Keflavíkurflugvöll vildu þeir ekkert heitar en að snúa við til höfuðborgarinnar. Þá hafði flugrútan hins vegar hætt að ganga.

Fengu 22 þúsund krónur og þurftu að redda sér sjálf

Þá var ekkert annað í stöðunni en að fá inni á hóteli. Það reyndist erfiðara en Fannýju hafði grunað enda reyndist enga hjálp að fá á flugvellinum þrátt fyrir að um væri að ræða börn án fylgdar. Eina hjálpin frá Icelandair var vilyrði fyrir 22 þúsund króna greiðslu fyrir hótelgistingu.

Fannýju tókst fyrir mikla mildi að bóka hótelgistingu fyrir börnin á Hótel Aurora sem er steinsnar frá Leifsstöð. Hefði hún ekki gert það hefðu börnin sennilega þurft að verja nóttinni í flugstöðinni enda ekki á bíl og ekkert far að fá.

„Það hlýtur að vera einhver sem hjálpar börnum í svona tilfelli,“ segir Fanný í samtali við Vísi.

Lítinn mat að fá

Auk greiðslu fyrir hótelgistingu hefur Icelandair einnig lofað börnunum sex þúsund krónum á haus fyrir mat á dag. Fanný segir hins vegar að það komi að litlum notum enda sé hvergi nokkurn mat að fá utan morgunverðar á hótelinu, sem er innifalinn.

„Hvað á ég að gera, láta börnin mín borða bara morgunmat?“ spyr Fanný og bætir við að henni finnist mjög óþægilegt að vera heima á Húsavík á meðan börnin hennar ganga í gegnum það sem hún kallar martröð.

Algjör óvissa ríkir

Þá segir Fanný að þau börnin óttist mikið að sagan endurtaki sig á morgun með tilheyrandi óvissu og óöryggi. Hún segist engar upplýsingar hafa fengið um framhaldið. „Það getur enginn gefið mér langtímaplan fyrir þessi börn sem eru ein á ferð,“ segir hún.

Hún furðar sig á því að betri áætlanir séu ekki í gildi þegar aflýsa þarf fjölda flugferða vegna veðurs og bendir á við búum á Íslandi og ættum að vera betur undirbúin.

Börnunum sagt að hypja sig

Fanný segir að börnunum hafi liðið ágætlega þegar á hótelið var komið allt þar til að símtal barst úr móttökunni þess efnis að þau þyrftu að rýma herbergið.

Fanný segir að fyrir misskilning hafi greiðsla hennar fyrir gistingunni ekki farið í gegn. „Í stað þess að hringja í mig hringdu þau í börnin og sögðu þeim að fara út,“ segir hún.

Þá gagnrýnir hún að ekki sé betra kerfi til staðar hjá Icelandair til þess að fólk þurfi ekki að leggja út fyrir hótelgistingu sem flugfélagið hyggst borga á endanum. Sér í lagi þegar um börn er að ræða.