Norskir fjölmiðlar segja að kraninn hafi fallið klukkan 9:20 að staðartíma í morgun en framkvæmdir hafa staðið fyrir utan verslunarmiðstöðina Melhustorget að undanförnu.
Talsmaður verktakafyrirækisins segir líklegt að vindhviða hafi valdið því að kraninn hafi fallið.
Á myndum má sjá að þak verslunarmiðstöðvarinnar er mikið skemmt. Tveir eru sagðir hafa slasast og voru fluttir á sjúkrahús. Ákveðið var að rýma verslunarmiðstöðina í kjölfar slyssins.
Enginn var í krananum sjálfum þegar hann féll.
Melhus er að finna suður af Þrándheimi.
