Einn er í haldi lögreglu vegna stunguárásar sem framin var í heimahúsi í Þverholti í Mosfellsbæ á tíunda tímanum í gærkvöldi. Hann var handtekinn á vettvangi að sögn Ásgeirs Þórs Ásgeirssonar, aðstoðarlögreglustjóra hjá lögreglunni á höfuðborgarsvæðinu.
Ásgeir segir í samtali við fréttastofu að einn hafi hlotið stungusár í átökunum og hafi hann verið fluttur á sjúkrahús með sjúkrabifreið í gærkvöldi. Lögreglubifreiðar hafi greitt leið sjúkrabílsins á bráðadeild.
Maðurinn sem var handtekinn á vettvangi er enn í haldi lögreglu og er rannsókn í fullum gangi.
Maður var fluttur á Landspítalann á tíunda tímanum í gærkvöldi vegna alvarlegs stungusárs sem hann hlaut í Þverholti í Mosfellsbæ.
