Shakira lætur Pique heyra það í nýju lagi

Shakira er ein vinsælasta tónlistarkona heims og kynntist hún Pique þegar hún gerði lagið Waka Waka fyrir heimsmeistaramótið í knattspyrnu árið 2010. Pique spilaði á mótinu með Spánverjum og sigraði mótið. Saman eiga þau tvö börn, Milan og Sasha. 

Saman bjuggu þau í Barcelona þar sem Pique spilaði fótbolta en árið 2018 var Shakira ákærð fyrir stórfelld skattsvik á Spáni. Skattyfirvöld þar sögðu hana skulda fjórtán og hálfa milljónir evra, 2,1 milljarða íslenskra króna. 

Málið fór fyrir dómstóla í sumar en stuttu fyrir það höfðu þau hjónin skilið. Ástæðan er sögð vera framhjáhald Pique. Talið er að hjásvæfa hans sé hin 22 ára gamla Clara Chia Marti sem starfaði fyrir framleiðslufyrirtækið Kosmos sem er í eigu Pique. 

Í gær gaf Shakira út lag ásamt tónlistarframleiðandanum Bizarrap. Lagið ber ekki neitt nafn en fjallar um Pique og gjörðir hans. 

Í laginu syngur Shakira um það að Pique hafi ekki verið til staðar þegar hún þurfti hvað mest á honum að halda. Hún segist aldrei ætla að byrja aftur með honum enda sé hann ekki neitt samanborið við hana. Lagið er afar valdeflandi.

„Þú fórst frá mér með móður þína sem nágranna þinn, fjölmiðla í dyragættinni og skuld við ríkissjóð. Þú hélst að þú myndir særa mig en þú gerðir mig sterkari. Konur eru hættar að gráta, konur fá núna borgað,“ er meðal þess sem Shakira syngur í laginu. 

Þá óskar hún Pique góðs gengis með nýju konunni en vill þó ekki meina að hann hafi verið að gera góð skipti. Hún sé sjálf virði tveggja 22 ára stelpna. 

„Þú skiptir Ferrari út fyrir Twingo. Þú skiptir Rolex-úri fyrir Casio-úr,“ syngur Shakira. 

Lagið hefur strax slegið rækilega í gegn og á þeim sólarhring síðan það kom út hafa 65 milljónir manna hlustað á það á YouTube. Þá hafa 5,4 milljónir manna líkað við myndbandið og 330 þúsund skrifað ummæli.