Fimmtíu bestu: Heimakletturinn og bakarinn úr Digranesinu

8. Kári Kristján Kristjánsson

Engin stétt handboltamanna er jafn oft hlutgerð og línumenn. Birgir Sigurðsson var ísskápurinn, Ágúst Birgisson mini ísskápurinn, Sigfús Sigurðsson Rússajeppinn og Pétur Júníusson Land Roverinn. Og Kári Kristján Kristjánsson er Heimakletturinn.

Það er allavega eitt erfiðasta og vanþakklátasta verkefni sem varnarmenn fá í hendurnar að glíma við Kára. Hann er eins og gíslatökumaður. Hann heldur varnarmönnum í gíslingu líkamsburða sinna og þeir eiga bara vonda kosti í stöðunni. Brjóta á honum og gefa vítakast og/eða brottvísun eða sleppa honum og treysta á guð og lukkuna.

Kári hefur verið að í tuttugu ár og hefur átt afar farsælan feril, bæði hér á landi og erlendis. Hann var í liði ÍBV sem fór í úrslit 2005, fór svo í Hauka og varð þar Íslandsmeistari í tvígang, varð deildarmeistari með Val 2015, var einn af aðalmönnum ÍBV þegar liðið vann þrennuna 2018 og svo bikarmeistari tveimur árum seinna.

Þrátt fyrir að hafa spilað erlendis í fimm ár er hann einn markahæsti leikmaður í sögu efstu deildar með 1.206 mörk. Í úrslitakeppninni hefur hann skorað 166 mörk og allt í allt tæplega 1.400 mörk sem er rosaleg tölfræði fyrir línumann.

Eitt mesta og besta tröll sem leikið hefur á línunni í íslensku deildinni. Ófyrirleitinn í allri sinni nálgun á leikinn, í jákvæðum skilningi. Varnarleikurinn var hins vegar hans mesti óvinur. Ef hann hefði náð að samhæfa sókn og vörn betur væri hann á meðal fimm bestu línumanna Íslands frá upphafi.

Gaupi

Svo er Kári auðvitað með skemmtilegri íþróttamönnum sem Ísland hefur alið. Hann má vera sem lengst að, þó það væri ekki nema bara fyrir þær sakir að hann litar handboltann í skemmtilegri litum en flestir.

7. Björgvin Páll Gústavsson

Það er ekki margt sem áeftir að segja um Björgvin Páll Gústavsson. Hann er okkar farsælasti markvörður og á magnaðan feril sem er hvergi nærri lokið.

Kannski eitt. Það er ekki oft sem leikmenn standast allar væntingar sem gerðar eru til þeirra. Björgvin var mikið efni, kom ungur inn í meistaraflokk HK, spilaði fyrsta landsleikinn átján ára og var í meistaraliði Íslands á EM U-18 ára 2003.

Eftir þessa byrjun á ferlinum voru væntingarnar til hans eðlilega miklar en hann hefur staðist þær. Hann hefur ekki misst af stórmóti frá því hann fór á sitt fyrsta, hjálpaði Íslandi að vinna Ólympíusilfur og EM-brons og átti flottan atvinnumannaferil.

Þegar hann hefur spilað hér heima er hann svo besti markvörður landsins. Björgvin var svo síðasta hráefnið sem Snorri Steinn Guðjónsson þurfti til að gera Valssúpuna fullkomna.

Björgvin er Valsliðinu mikilvægur sem markvörður en ekki síður sem „kastari“. Hann er eldsnöggur að koma boltanum leik, bæði eftir að hann hefur varið eða Valur fengið á sig mark. Valsliðið spilaði hratt án Björgvins en eftir að hann kom jaðrar hraðinn við lög.

Eitt mesta efni sem komið hefur fram í íslenskum handbolta. Það þurfti spænskan markvörð til að koma auga á að þarna væri á ferð markvörður sem gæti skilað Íslandi í verðlaunasæti á stórmóti. Það gekk heldur betur eftir. Enn í dag er Björgvin besti markvörður deildarinnar.

Gaupi

Björgvin vann allt sem hægt var að vinna með Val á síðasta tímabili og á eflaust eftir að bæta fjölmörgum titlum við því ekkert bendir til þess að hann sé farinn að gefa eftir.