Sextán ára undrabarn sleit krossband á æfingu rétt fyrir keppni á HM

Hin sextán ára Lara Colturi var mætt til Méribel í Frakklandi til að keppa á HM en sleit krossband á æfingu í gær.

Albanska skíðasambandið sagði frá þessu á miðlum sínum.

„Við höfum ekki góðar fréttir. Því miður endaði heimsmeistaramótið hjá Lara Colturi áður en það byrjaði. Á æfingu á þriðjudaginn þá datt hún og sleit krossbandið í hægra hné. Við óskum henni góðs gengis í endurhæfingunni,“ sagði á samfélagsmiðlum sambandsins.

Þessi sextán ára stelpa þykir ein efnilegasta skíðakona heims en hún vann bæði gull og brons á heimsmeistaramóti unglinga í janúar.

Hún hafði einnig náð að komast í hóp þrjátíu efstu í heimsbikarnum í stórsvigi.