Lögmaður Trumps í sigti saksóknara

Krafa saksóknaranna byggir samkvæmt frétt New York Times á lagaákvæði um lögmannatrúnað sem er til marks um að þeir telja lögmanninn, sem heitir Evan Corcoran, hafa veitt Trump ráð eða þjónustu varðandi það að fremja glæp.

Eins og frægt er lögðu starfsmenn Alríkislögreglu Bandaríkjanna (FBI) hald á mikið magn opinberra og leynilegra gagna í Mar-a-Lago, sveitaklúbbi og heimili Trumps í Flórída, þegar húsleit var gerð þar í ágúst í fyrra. Trump vill meina að hann eigi muni og gögn sem hald var lagt á og einnig að trúnaður ríki um önnur gögn.

Lögum samkvæmt hefði Trump átt að afhenda Þjóðskjalasafni Bandaríkjanna öll opinber gögn í hans vörslu er hann flutti úr Hvíta húsinu í janúar í fyrra.

Fram hefur komið að af þessum þrettán þúsund skjölum eru um hundrað þeirra ríkisleyndarmál og sum þeirra sögð mjög mikilvæg leyndarmál.

Meðal þess sem áðurnefndir saksóknarar eru að skoða er hvort Trump og starfsfólk hans hafi brotið lög með því að verða ekki við kröfum um að gögnunum yrði skilað. Dómsmálaráðuneytið stefndi Trump í maí í fyrra og krafðist þess að hann skilaði öllum opinberum skjölum og gögnum sem hann hafði tekið með sér úr Hvíta húsinu. Þá hafði Trump skilað hluta skjalanna og fundust nærri því tvö hundruð leynileg skjöl meðal þeirra.

Hétu því að engin skjöl væru eftir

Corcoran hitti rannsakendur í júní og lét þá fá rúmlega þrjátíu skjöl vegna stefnunnar. Annar lögmaður Trumps, sem heitir Christina Bobb, skrifaði svo undir yfirlýsingu um að engin frekari opinber gögn hefðu fundist í Mar-a-Lago, sveitarklúbb og heimili Trumps í Flórída. „Ítarleg leit“ hefði verið framkvæmd.

Bobb sagði rannsakendum að Corcoran hefði upprunalega skrifað þá yfirlýsingu en hún hefði bætt nokkrum varnöglum við hana áður en hún skrifaði undir.

Þegar starfsmenn FBI leituðu í húsnæðinu í ágúst fundu þeir þó mikið magn opinberra gagna og þar á meðal meira en hundrað leynileg skjöl. Dómsmálaráðherra Bandaríkjanna skipaði í fyrra sérstakan rannsakenda til að halda utan um rannsóknina.

Corcoran bar nýverið vitni fyrir ákærudómstól í Washington DC og samkvæmt heimildum New York Times neitaði hann að svara spurningum á grunni trúnaðar milli lögmanns og skjólstæðings.

Ákærudómstóll er fyrirbæri vestanhafs þar sem kviðdómendur eru fengnir til að fara yfir vitnisburð og gögn í ákveðnum málum og kanna hvort þeim þyki tilefni til að leggja fram ákærur vegna meintra brota.

Talsmaður Trumps sagði í samtali við NYT að um pólitískar nornaveiðar væru að ræða og að markmiðið væri að koma í veg fyrir endurkjör Trumps í forsetakosningunum á næsta ári.

Í miklum lagalegum vandræðum

Trump stendur frammi fyrir margskonar lagavandræðum. Meðal annars stendur hann frammi fyrir mögulegri ákæru í Georgíu vegna afskipta hans af framkvæmd forsetakosninganna 2020 þar.

Hann hefur einnig nýverið verið sektaður fyrir tilhæfulausa málsókn og fyrirtæki hans var nýlega dæmt fyrir skattsvik. Þar að auki hefur Trump sjálfur verið kærður fyrir nauðgun.