Eydís Evensen tilkynnir Evróputúr

Hér má sjá tónlistarmyndbandið, sem er leikstýrt af Einari Egilssyni:

Verkið heitir Tephra Horizon sem þýðist sem jarðlaga sjóndeildarhringur.

Eldgos og alls konar tilfinningar

„Verkið spratt út frá því þegar við vorum með gosið okkar fagra í Fagradalsfjalli og ég var bara ótrúlega innblásin af því. Við Einar fengum að gera myndverk í kringum það eldgos og máttum fljúga yfir eldgosið 17 klukkutímum eftir að það byrjaði. 

Ég fór að hágráta og hlæja og upplifði allan tilfinningaskalann,“ 

segir Eydís og bætir við:

„Eftir það gerðum við myndband um þessa upplifun og héldum áfram að koma aftur að gosinu. Þetta var alltaf jafn mindblowing og magnað. 

Þetta verk kemur út frá því og myndverkið tengir Reykjanesskagann og eldgosið. Þannig við erum með smá myndefni frá því gosi og hraun laginu. Þetta er í rauninni heill hringur (e. full circle) og þetta hring element kemur fram í myndverkinu.“

Skapandi par

Eydís og Einar eru par sem hafa unnið mikið saman í gegnum tíðina. Að sögn Eydísar eru mjög oft skapandi samræður í gangi hjá parinu.

„Það er oft erfitt að ýta á pásu yfir kvöldmatnum, við erum alltaf að fá nýjar hugmyndir og það er frábært að geta unnið með makanum sínum. 

Það er líka extra mikið traust, við erum óhrædd við að segja nákvæmlega hvað okkur finnst og hvernig við þróum hugmyndirnar áfram.“

Eydís segir innblásturinn koma til sín á ólíka vegu.

„Stundum er líka erfitt að ýta á stopp þar en aðra daga finnur maður fyrir til dæmis áhrifum frá veðrinu og þá vill maður vera undir sæng og gera ekki neitt. 

Þetta fer eftir hugarástandi og þegar ég vil sækja mér innblástur þá leita ég í tónlist, kvikmyndir eða bækur. Þá er ég að detta inn í þannig lestur eða áhorf og þá kannski hjálpar það mér að komast á réttan stað. Það er breytilegt.“

Ný breiðskífa

Eins og áður segir er Eydís að fara að senda frá sér plötu sem ber heitið The Light en hún hefur verið lengi í vinnslu og kemur út 26. maí.

„Ég samdi nokkur af verkum plötunnar þegar ég bjó í New York á árunum 2018-2020, þannig þetta er í raun samansafn sem spannar yfir nokkur ár. Hugmyndir hér og þar sem ég hef sótt í.“

Hún segir þetta verið krefjandi og lærdómsríkt ferli.

„Það er vissulega áskorun að setja saman ákveðið kort af hugsunum og tilfinningum og færa það yfir í heilsteypt verk sem þessi plata er, en það er líka mjög losandi og heilbrigt andlega að geta sett ákveðnar tilfinningar út. 

Í staðinn fyrir að vilja betrumbæta stöðugt, þá er gott að setja þetta út og halda áfram.“

Píanóið traustur vinur

Tónlistin hefur í gegnum tíðina reynst Eydísi góður andlegur stuðningur

„Alveg frá því ég byrjaði að semja tónlist hefur píanóið verið minn besti vinur. 

Ég bjó erlendis í sjö ár og ferðaðist mikið. Þegar var komin til nýrrar borgar og átti kannski ekki marga vini þá var píanóið alltaf til staðar, sama hvert ég fór. 

Líka það að geta sest alltaf sest niður við það, hvort sem það er að spila verk sem ég æfði þegar ég var að læra á píanó eða bara að losa um einhverjar tilfinningar. Þetta er svo mikil losun, alveg eins og oft í jóga tíma eða hugleiðslu.“

Eydís hefur gert það gott í Evrópu og komið fram víða. Sem dæmi má nefna Royal Albert Hall í London og framkomu hennar með Damon Albarn á ARTE Concert Festival í París.

Ólýsanlegt móment

Árið 2018 markar straumhvörf í hennar lífi þegar hún hélt tónleika í Iðnó og fékk í kjölfarið plötusamning.

„Mig var búið að langa að byrja þennan tónlistarferil í mörg ár og við Nick, umboðsmaðurinn minn, ákváðum að halda tónleika. Hann hjálpaði mér að plana allt frá fyrsta degi.“

Á tónleikunum spilaði Eydís sex verk.

„Eftir showið var ég mjög eftir og stressuð. Ég ákvað að stökkva á barinn og fá mér einn bjór til að róa taugarnar. Fyrsta manneskjan sem mætir mér eftir giggið er Dirk Lange frá Sony með nafnspjaldið sitt. Ég get ekki lýst því þessu mómenti með orðum.“

Á síðustu árum hefur Eydís þróast mikið í listsköpun sinni.

„Ég var alltaf að hugsa hvort þetta væri eitthvað sem maður getur virkilega gert að sínum frama. Ég hafði alltaf gert tónlist bara til hliðar frá því ég var í skóla en eftir þetta móment með Dirk Lange fann ég virkilega innst inni að ég gæti átt tækifæri í tónlistarbransanum.“

Aukið sjálfstraust í bransanum

Samræðurnar leiddu svo til þess að Eydís fékk plötusamning.

„Ég hef aldrei lært tónsmíðar, ég hef bara lært píanóleik. Ég var alltaf með smá imposter syndrome í tengslum við það og hugsaði fyrst hvort þetta væri eitthvað sem ég gæti gert.“

Blessunarlega hefur sjálfstraustið aukist til muna hjá Eydísi og þakkar hún þá sérstaklega sínu frábæra teymi. 

„Þau hjálpuðu mér að komast á næsta stað og vera óhrædd. Sömuleiðis fjölskylda og vinir.

Í þessu ferli hef ég fundið sjálfstraustið verða meira. Fyrst þorði ég ekki að segja neitt, fór upp á svið, spilaði og fór. Nú líður mér betur upp á sviði.“

Eydís segist mjög þakklát og heppin með umboðsmanninn sinn.

„Hann er bara að vinna með mér og Sóleyju Stefánsdóttur og hefur upp á síðkastið bara viljað vinna með kvenkyns artistum, til að ýta undir að við fáum þessa rödd sem hefur kannski verið skortur á fyrir konur í tónlistarbransanum.

Það hafa komið upp tilvik, til dæmis hjá fólki sem starfar í tónleikahöllum þar sem ég er að spila, þar sem ég hugsa að það væri öðruvísi virðing borin fyrir mér ef ég væri karlkyns artisti. En það hefur alltaf verið leist á mjög mindful hátt. Fólk í kringum mig hefur líka geta staðið upp fyrir mér þegar ég á erfitt með það.“

Stórt tónleikaferðalag

Eydís fer í tónleikaferðalag um Evrópu í sumar og stefnir á Bandaríkin og Kanada síðar á árinu. Þá kemur hún einnig fram á risa tónlistarhátíðinni South by Southwest í Texas í mars. Hún byrjar þó á að vera með tónleika í Hannesarholti föstudaginn 24. febrúar næstkomandi.

„Hugmyndin að Hannesarholts tónleikunum fór af stað eftir síðasta sumar. Þá var ég búin að halda tónleika í mínum heimabæ, Blönduósi fyrir norðan. Í kjölfarið hóf ég samræður við Iceland Sync um að halda mögulega tónleikaseríu í kirkjum landsins, sem reyndar hefur ekki enn orðið að. 

Við hugsuðum að það gæti verið áhugaverð byrjun að hafa tónleika í Hannesarholti, en þetta er í fyrsta skipti sem ég mun spila þar. Þetta er æðislegur salur, fallegur hljómburður og flygillinn er frábær. Ég hlakka mikið til,“ segir Eydís að lokum.