Frum­sýning á Vísi: Tón­listar­mynd­band við Söngva­keppnis­lag Silju Rósar og Kjalars

Nú á dögunum tóku Silja Rós & Kjalar upp lifandi órafmangaða útgáfu af Together we grow í Stúdíó Bambus. Alda Valentína Rós sá um upptökur og eftirvinnslu á myndefni og Stefán Örn Gunnlaugsson um upptökur og mix af laginu sjálfu.

„Lagið fjallar um það að fylgja hjartanu sínu í einu og öllu og það eru skilaboðin sem ég vil skilja eftir hér líka.“

Myndbandið má sjá í spilaranum hér fyrir neðan.

Lagið varð til í Kaupmannahöfn þar sem Silja Rós var búsett í tvö ár. Hún samdi það ásamt danska lagahöfundinum Rasmus Olsen. Þau kynntust fyrstu vikuna sem Silja Rós var búsett í Danmörku og byrjuðu strax að vinna saman.

„Rasmus er líkt og ég mikill Eurovision aðdáandi og við ákváðum að semja tvö lög með Eurovision í huga. Í haust lét ég verða að því og sendi lögin inn í keppnina og fékk svo ansi skemmtilegt símtal frá Rúnari þegar lagið komst inn í keppnina. Það kom skemmtilega á óvart og ég er eiginlega ennþá að meðtaka það að við séum að fara að keppa á laugardaginn,“ segir Silja Rós.

Kjalar þekkja flestir, en hann söng sig inn í hjörtu fólks í Idolinu á Stöð 2 og endaði í öðru sæti. Kjalar og Silja Rós hafa þekkst í tvö ár en þau hafa bæði stundað nám í Tónlistarskóla MÍT/FÍH.

„Lagið var upphaflega sóló lag, en ég fékk sterka tilfinningu í haust að lagið ætti að vera dúett, mér fannst textinn kalla á það. Svo þegar lagið komst inn þá fórum við að velja dúett félaga og þá var Kjalar fyrsta nafnið sem kom upp í hugann. Ég er ótrúlega þakklát fyrir að fá að deila sviðinu með honum á laugardaginn og veit ekki um betri ferðafélaga í þessu ævintýri.“

Spennt að fara á svið

Hópurinn er fullur eftirvæntingar fyrir stóru stundinni á laugardaginn. Æfingar á atriðinu hafa staðið yfir síðan í janúar og mega áhorfendur búast við draumkenndu atriði í takt við lagið.

„Við höfum verið í svo ótrúlega góðum höndum seinustu mánuði og unnið með dásamlegu fólki að atriðinu. Það hefur verið magnað að vinna með Lee Proud danshöfundi og Salóme Þorkelsdóttur, ég er mjög stolt af atriðinu okkar. Kristjana Stefánsdóttir raddþjálfi hefur líka staðið þétt við bakið á okkur, en hún er búin að fylgja Kjalari bæði í Söngvakeppninni og Idol. Núna erum við bara spennt að komast upp á sviðið og deila listinni.“