Rúnar og félagar komust aftur á sigurbraut og stukku upp um þrjú sæti

Rúnar og félagar höfðu tapað þremur af seinustu fjórum deildarleikjum sínum og gert eitt jafntefli. Það var því léttir fyrir liðið þegar Efkan Bekiroglu kom Alanyaspor í forystu með marki snemma í síðari hálfleik.

Heimamenn í Alanyaspor þurftu þó að leika seinustu tuttugu mínútur leiksins manni færri eftir að Leroy Fer nældi sér í beint rautt spjald, en það kom ekki að sök og niðurstaðan varð 1-0 sigur heimamanna.

Rúnar Alex stóð vaktina í marki Alanyaspor í kvöld, en með sigrinum stökk liðið upp um þrjú sæti í deildinni, úr ellefta sæti og upp í það áttunda. Liðið er nú með 28 stig eftir 23 leiki, tólf stigum á eftir Basaksehir sem situr í fjórða sæti.