Reykjanesbraut breikkuð milli Hafnarfjarðar og Hvassahrauns

Kristján Már Unnarsson skrifar 6. mars 2023 22:22

Svona mun kafli Reykjanesbrautar við Straumsvík líta út eftir breikkun. Vegagerðin

Breikkun Reykjanesbrautar á milli Hafnarfjarðar og Hvassahrauns hefur verið boðin út og eru verklok áformuð eftir þrjú ár. Jafnframt hefur Vegagerðin auglýst forval vegna nýrrar Ölfusárbrúar við Selfoss.

Í fréttum Stöðvar 2 mátti sjá myndir af því hvernig þessi kafli Reykjanesbrautar mun líta út eftir breikkun en hann er sá síðasti sem eftir er að tvöfalda milli Hafnarfjarðar og Njarðvíkur.

Yfirlitsmynd af framkvæmdasvæðinu.Vegagerðin

Það átti reyndar að bjóða út þennan 5,6 kílómetra langa kafla í fyrra en þá fékk Vegagerðin ekki fjármagn. Einnig hefur verkið stækkað síðan þá, að sögn verkefnisstjórans Jóns Heiðars Gestssonar.

Jón Heiðar Gestsson er verkefnisstjóri Reykjanesbrautar hjá Vegagerðinni.Egill Aðalsteinsson

„Við fengum allavega fé í þetta núna enda gríðarleg pressa á þessu verkefni út af ýmsu, öryggismálum, og hérna er alþjóðaflugvöllur.

Og við vitum nú hvernig síðasti vetur var. Það var ýmislegt í gangi þar varðandi stopp á Reykjanesbrautinni, sem hefði kannski verið hægt að koma í veg fyrir hefði þetta verið búið,“ segir Jón Heiðar.

Tvöfölduð Reykjanesbraut við Straumsvík.Vegagerðin

Og það var annað stórverk auglýst hjá Vegagerðinni, ný Ölfusárbrú.

„Það er forval. Þannig að það er ekki búið að velja verktaka í því útboði. En þetta eru allavega þau tvö verkefni sem eru núna auglýst,“ segir Jón Heiðar.

Ný mislæg gatnamót verða við Rauðamel sem tengjast framtíðar byggingarlandi Hafnarfjarðar.Vegagerðin

Á Reykjanesbraut verða gerð mislæg gatnamót við Rauðamel til að greiða leið að nýjum framtíðar byggingarsvæðum Hafnarfjarðar. Sömuleiðis verða mislægu gatnamótin við Straumsvík stækkuð og bætt við tengingu að iðnaðarsvæði Hafnarfjarðar við Álhellu en tilboð verða opnuð 4. apríl.

Mislægu gatnamótin við Straumsvík verða stækkuð og bætt við vegtengingu að iðnaðarhverfinu við Álhellu. Neðst til hægri má sjá hvar ný undirgöng koma fyrir göngu- og reiðhjólafólk.Vegagerðin

„Við munum í framhaldinu fara yfir tilboðin og semja. Þannig að verktaki ætti að geta hafið verkið á framkvæmdastað svona í maí,“ segir verkefnisstjórinn.

Þegar til stóð í fyrra að bjóða verkið út var miðað við verklok sumarið 2025. Núna er orðin ársseinkun. Það á ekki að ljúka verkinu fyrr en sumarið 2026, eftir rúm þrjú ár. Vegfarendur munu þó njóta vegbótanna að hluta eitthvað fyrr.

Horft frá Krýsuvíkurgatnamótum í átt til Suðurnesja.Vegagerðin

„Við reynum að opna megnið af Reykjanesbrautinni árið 2025. En svo er síðasti kaflinn þarna, svona hálfur kílómetri í kringum Straumsvík, hann verður opnaður 30. júní 2026,“ segir Jón Heiðar Gestsson, verkefnisstjóri Reykjanesbrautar hjá Vegagerðinni.

Hér má sjá frétt Stöðvar 2:

Hér má sjá myndband Vegagerðarinnar af breikkun Reykjanesbrautar:

Vegagerð Samgöngur Hafnarfjörður Umferðaröryggi Keflavíkurflugvöllur Ný Ölfusárbrú

Tengdar fréttir

Tveir fluttir á bráðadeild eftir árekstur á Reykjanesbraut

Reykjanesbraut er lokuð í báðar áttir vegna umferðarslyss sem varð á einbreiða kaflanum sunnan við álverið í Straumsvík í Hafnarfirði á níunda tímanum í morgun.

13. febrúar 2023 08:56

Forval verktaka að hefjast vegna nýrrar Ölfusárbrúar

Forval vegna smíði nýrrar Ölfusárbrúar verður auglýst í janúar og er stefnt að því að framkvæmdir hefjist síðla næsta árs. Brúarsmíðin verður þó talsvert seinna á ferðinni en búið var að lofa kjósendum.

30. desember 2022 06:00

Hefðu ekki getað komið í veg fyrir lokun Reykjanesbrautar

Starfshópur hefur komist að þeirri niðurstöðu að ekki hafi verið hægt að koma í veg fyrir að loka varð Reykjanesbraut vegna veðurs í desember. Fleiri tiltækar vinnuvélar hefðu þó getað stytt tímann sem var lokað og betur hefði mátt standa að snjómokstri. Innviðaráðherra mun veita Vegagerðinni heimild til að færa ökutæki við snjómokstur.

23. janúar 2023 11:31

Reyndu allt til að halda veginum opnum við fordæmalausar aðstæður

Vegamálastjóri telur að ekki hafi verið hægt að koma í veg fyrir lokun Reykjanesbrautar þegar óveðrið gekk yfir í vikunni en mögulega hefði verið hægt að opna fyrr. Vegagerðin skoðar nú hvort og þá hvað hefði mátt fara betur en um hafi verið að ræða fordæmalausar aðstæður.

22. desember 2022 21:00

Tíu milljarða vantar í fjárlög upp í loforðin í vegagerð

Tíu milljarða króna gat er í nýsamþykktum fjárlögum næsta árs til að unnt verði að standa við þau fyrirheit sem gefin voru í samgönguáætlun fyrir síðustu kosningar. Breikkun Suðurlandsvegar í útjaðri Reykjavíkur er meðal þeirra verkefna sem skorin verða niður.

21. desember 2022 10:20

Ljúka breikkun Reykjanesbrautar milli Hafnarfjarðar og Njarðvíkur

Langþráð breikkun Reykjanesbrautar milli Straumsvíkur og Hvassahrauns er á leið í útboð og stefnt að því að fimm milljarða króna framkvæmdir hefjist um mitt sumar. Með verkinu lýkur tvöföldun leiðarinnar milli Reykjavíkur og Suðurnesja.

27. apríl 2022 22:22

Breikkun Reykjanesbrautar fer um svæði á náttúruminjaskrá

Umhverfismat er hafið vegna breikkunar Reykjanesbrautar framhjá Straumsvík milli Krýsuvíkurvegar og Hvassahrauns. Tvöfalda á 5,6 kílómetra kafla, úr tveimur akreinum í fjórar, en þetta er eini kaflinn á Reykjanesbrautinni milli Hafnarfjarðar og Njarðvíkur sem ekki hefur verið breikkaður.

6. október 2020 16:05