Hafa ekki enn náð að yfir­heyra mennina sökum á­stands

Þetta segir Ævar Pálmi Pálmason hjá miðlægri rannsóknardeild lögreglunnar á höfuðborgarsvæðinu. 

Lögregla fékk tilkynningu á sjöunda tímanum um hávaða og háreysti í húsinu og voru þrír á vettvangi þegar lögreglu bar að garði. Einn reyndist meðvitundarlaus þegar lögreglu bar að garði og var hann úrskurðaður látinn við komuna á sjúkrahús. Hinir tveir voru handteknir og eru enn í haldi. 

Lögregla hefur ítrekað reynt að yfirheyra mennina vegna málsins í dag en miðað við ástand þeirra er óljóst hvort það takist fyrr en í fyrramálið, að sögn Ævars. Reynt verður áfram í kvöld en takist það ekki mun lögregla þurfa að skoða aðrar ráðstafanir og fá úrskurð til að halda þeim lengur en í sólarhring. 

Að svo stöddu eru meiri líkur en minni að andlátið hafi ekki borið að með saknæmum hætti. Lögregla lauk vettvangsrannsókn í morgun að mestu en vettvangurinn hefur þó verið innsiglaður. Rannsókn er að öðru leyti í fullum gangi.