Hákon Arnar undir smásjá þýskra úrvalsdeildarliða

Samkvæmt heimildum danska fjölmiðilsins Tipsbladet hafa nokkur félög úr þýsku úrvalsdeildinni spurst fyrir um þennan nítján ára gamla Skagamann sem gerði nýjan fjögurra ára samning við Danmerkurmeistara FCK á dögunum.

Þrátt fyrir nýja samninginn er talið að tilboð gætu borist í sumar sem FCK sé einfaldlega ekki stætt á að hafna en síðan félagið hafnaði tilboði frá RB Salzburg upp á tvo milljarða íslenskra króna í byrjun árs hefur Hákon algjörlega sprungið út í dönsku úrvalsdeildinni og ljóst að verðmiðinn hefur hækkað verulega.

Hann skoraði í öllum þremur deildarleikjum liðsins í mars og gaf eina stoðsendingu að auki og var valinn bæði besti leikmaður og besti ungi leikmaður mánaðarins í deildinni.