Skemmti­leg rapp-við­bót en er blótað of mikið?

Þeir segjast hafa stofnað sveitina upphaflega í gríni sem YouTube rás með íþróttamyndböndum og fleiri skemmtilegum hlutum. Fljótlega byrjuðu þeir þó að búa til tónlist. „Þetta gerðist allt bara óvart og það má segja að Sprite Zero Klan hafi eiginlega verið grín sem fór of langt,“ segir Kolbeinn. „Við semjum allt okkar efni sjálfir,“ bætir Daníel við. „Svo reynum við að finna góðan farveg fyrir þessar hugmyndir hjá góðu fólki eins og lenskan er í tónlistinni.“

Skúrinn hóf göngu sína á Vísi í síðustu viku en þar keppa sex flytjendur um bestu nýju útgáfuna af gamla góða SS pylsulaginu auk þess sem þeir flytja einnig frumsamið lag.

Glöggir hlustendur heyra að það er talsvert meira blótað í þessari útgáfu SS pylsulagsins en öðrum lögum sem keppa í Skúrnum. „Það er svolítið blótað í laginu, það verður bara að segjast. Það er bara eitthvað sem kemur til okkar. Stundum hefur maður það mikið að segja að orðin gusast út úr manni. Og þetta er það kom út að þessu sinni, það er bara þannig. Listamaður á auðvitað aldrei að ritskoða sig, nema stundum. Klárlega stundum.“

Frumsamda lag þeirra félaga heitir Í góðum gír og kemur frá hjarta þeirra að eigin sögn: „Lagið er í takt við kjarnagildi bandsins sem er stuð og stemning, gaman og fjör. Innihald lagsins snýst um það að vera í góðum gír. Við leggjum mikið upp úr því að vera hressir, a.m.k. ekki fúlir.“

Sjötti og síðasti flytjandinn verður kynntur á morgun miðvikudag.