17 ára saxa­fón­leikari út­setur fyrir stór­sveit

Hún hefur spilað á saxófón og klarínett í níu ár og er á öðru ári í Menntaskólanum í tónlist auk þess að stunda nám í Menntaskólanum við Hamrahlíð.

„Þrír ótengdir aðilar sendu mér auglýsinguna um samkeppnina um nýja SS pylsulagið með þeim skilaboðum að ég þyrfti að taka þátt. Ég hugsaði mig um í viku og þegar fresturinn var að renna út skráði ég mig til leiks.“

Skúrinn hóf göngu sína á Vísi í síðustu viku en þar keppa sex flytjendur um bestu nýju útgáfuna af gamla góða SS pylsulaginu auk þess sem þeir flytja einnig frumsamið lag.

Lilja Sól hefur mesta reynslu af því að spila jass og því lá beinast við að útgáfa hennar tæki mið af því. „Ég vildi gera eitthvað öðruvísi enda vissi ég að margir myndu senda inn poppútgáfur af SS pylsulaginu.“

Hún segir hugmynd sína ganga út á að fara aftur í tímann, til þess tíma þegar SS pylsurnar voru fyrst framleiddar en það var á gullaldarárum stórsveitanna. „Ég valdi því að gera útsetningu fyrir stórsveit þar sem ég þurfti að m.a. að skrifa nótur fyrir um 20 hljóðfæri. Þetta er því mikil jass útsetning með „swingi“, útsetning sem inniheldur stóra og þykka hljóma. Fannar Árni Ágússton syngur lagið.“

Frumsamda lagið sem Lilja Sól sendir inn heitir Mjólkin. „Ég samdi lagið í desember á síðasta ári en það er fyrsta lagið sem ég sem í upptökuforritinu Ableton. Vinur minn úr MH, Elías Mikael Steinarsson, samdi textann og ég syng. Lagið fjallar um mjólk og hversu góð hún er fyrir mann.“

Lilja Sól var síðasti flytjandinn sem kynntur er til sögunnar í fyrri umferð Skúrsins.