Rockets ræður þjálfarann sem Celtics setti í bann

Samkvæmt öruggum heimildum vestanhafs verður Udoka næsti aðalþjálfari Houston þó félagið eigi enn eftir að opinbera ráðninguna. Undir stjórn Udoka komst Celtics alla leið í úrslit NBA deildarinnar í fyrsta skipti í 12 ár. Þar beið liðið þó lægri hlut gegn Golden State Warriors, 4-2.

Celtis dæmdi hinn 45 ára gamla Udoka í ársbann frá félaginu eftir að upp komst um ástarævintýri hans og samstarfskonu hans. Þótt sambandið hafi verið með samþykki beggja aðila var það brot á reglum Boston um samskipti starfsfólks.

„Ég vil biðja leikmenn, stuðningsmenn, öll hjá Boston Celtics og fjölskyldu mína afsökunar. Er miður mín að hafa sett liðið í þessa erfiðu stöðu og uni ákvörðun þess. Af virðingu við alla hlutaðeigandi ætla ég ekki að tjá mig frekar,“ sagði Udoka eftir að upp komst um framhjáhald hans.

Kom það í ljós eftir að félagið hóf rannsókn á hegðun þjálfarans eftir að önnur samstarfskona Udoka hafði ásakað hann um að láta óæskileg ummæli falla.

Nú er ljóst að Udoka mun ekki stýra Celtics á næstu leiktíð en hann hefur samið við Houston Rockets. Á hann að koma liðinu upp úr kjallara NBA deildarinnar en Houston hefur verið með slakari liðum deildarinnar undanfarin ár.