Víkingur einum sigri frá Olís-deildinni

Víkingur vann fyrsta leikinn sem fram fór á þriðjudaginn og liðið gat því komið sér í vænlega stöðu með sigri á útivelli í kvöld.

Víkingar byrjuðu leikinn af miklum krafti og skoruðu fimm af fyrstu sex mörkum leiksins. Fjölnismenn vöknuðu þó til lífsins um miðjan fyrri hálfleikinn og skoruðu níu mörk gegn aðeins tveimur mörkum gestanna. Það voru því Fjölnismenn sem fóru með fjögurra marka forystu inn í hálfleikinn, staðan 15-11.

Gestirnir voru þó ekki lengi að snúa taflinu við á ný og þeir voru búnir að jafna metin þegar aðeins rétt rúmar tíu mínútur voru liðnar af síðari hálfleik. Víkingar náðu svo loks forystunni á ný þegar tíu mínútur voru til leiksloka og litu aldrei um öxl eftir það. Liðið vann að lokum fjögurra marka sigur, 25-29, og er nú í kjörstöðu fyrir þriðja leik liðanna sem fer fram á heimavelli þeirra næstkomandi mánudag.

Gunnar Valdimar Johnsen og Arnar Gauti Grettisson voru atkvæðamestir í liði Víkings með fimm mörk hvor, en í liði Fjölnis var Björgvin Páll Rúnarsson markahæstur með sjö mörk.