Fjölnir knúði fram oddaleik eftir maraþonleik og vítakeppni

Víkingur vann sigur í fyrstu tveimur leikjum liðanna en Fjölnir vann eins marks sigur á útivelli í þriðja leiknum og því þurftu liðin að mætast í Grafarvogi í kvöld.

Og það var enginn smá leikur sem áhorfendur fengu í kvöld. Víkingar byrjuðu betur og náðu þriggja marka forskoti en Fjölnismenn voru ekki lengi að koma til baka og jafna metin. Síðari hálfleikur var jafn og spennandi en Víkingar leiddu með einu marki þegar skammt var eftir.

Á lokasekúndunum fengu Fjölnismenn hins vegar víti sem Goði Ingvarsson skoraði úr og jafnaði í 27-27. Það varð því að framlengja leikinn.

Í fyrri framlengingunni voru Víkingar skrefinu á undan og náðu meðal annars tveggja marka forskoti. Fjölnismenn komu hins vegar til baka og jöfnuðu á ný þegar örfáar sekúndur voru eftir og því þurfti að framlengja á ný.

Í annarri framlengingunni voru Víkingar síðan enn og aftur nálægt því að tryggja sér sæti í Olís-deildinni. Þeir glutruðu hins vegar niður tveggja marka forskoti og aftur náðu Fjölnismenn að jafna metin á síðustu sekúndunni.

Staðan 36-36 og ekkert eftir nema að grípa til vítakastkeppni. Þar gekk báðum liðum frekar illa að skora. Að loknum fimm umferðum höfðu bæði lið skorað úr þremur vítaköstum og því þurfti bráðabana.

Þar klikkaði Gunnar Valdimar Johnsen á fyrsta vítakasti Víkinga en Goði Ingvarsson skoraði fyrir Fjölni. Lokatölur 40-39 og það er því oddaleikur framundan í einvíginu en hann verður leikinn á heimavelli Víkinga í Safamýri á sunnudag.

Upplýsingar um gang mála í vítakeppninni eru fengnar af handbolti.is