„Það stoppaði bíll þarna og þurfti að bíða á meðan 80 naktir menn hlupu“

„Það eru til geggjaðar sögur. Alltaf í útileikjum er það hefð að það er alltaf hlaupið naktir yfir eina brú. Þetta er kallað rokkhlaup í okkar liði. Við höfum hlaupið yfir Ölfusárbrú þarna hjá pylsuvagninum. Það er bara allir út og hlaupið,“ sagði Ingimar Helgi.

Þessi hefð hefur svo undið upp á sig með tímanum og síðar var farið að hlaupa rokkhlaup í samkomum liðsins sem Ingimar kallar „þjöppur.“

„Svo gerðum við þetta í einhverri „þjöppu“ sem var haldin heima hjá Guðjóni þjálfara. Þá hlupum við um hverfið sem svona eftir á hyggja var svolítið skrýtið í úthverfi á Selfossi bara.“

„Eitt skiptið vorum við í sjálfstæðishúsinu á Selfossi sem er samt í miðbænum. Tengdamamma mín er að starfa þarna fyrir Sjálfstæðisflokkinn og leigir okkur þetta út. Þar er ákveðið að taka rokkhlaup og þá átti að hlaupa í átt að lögreglustöðinni, snerta hurðarhúninn og hlaupa til baka. Fyrst í kringum eitthvað stórt hús og þetta var alveg 7-800 metra sprettur og bara allir út.“

„Svo er ég heima hjá tengdó daginn eftir. Hringir ekki lögreglan í hana og spyr hverjir hefðu verið í húsinu í gær. „Við leigðum þetta til Árborgar“ sagði tengdó og horfði svona á mig. Ég hugsaði bara shit. Þá hafði einhver kona í stóra húsinu hringt í lögregluna og kvartað undan nöktum mönnum og löggan sá svo í eftirlitsmyndavélum bara alla sem gerðu þetta. Tengdó var svo boðið að koma og skoða upptökuna en hún afþakkaði það og sagði að tengdasonur sinn væri í liðinu,“ sagði Ingimar og hló.

Undanfarin ár hafa liðsmenn Árborgar bryddað upp á þeirri nýjung sem ekki hefur heyrst mikið af áður að halda jólasamkomu þar sem öllum leikmönnum í sögu Árborgar er boðið að koma saman og skemmta sér. Þar er að sjálfsögðu hlaupið rokkhlaup.

„Guðjón þjálfari og fleiri eru svo farnir að halda Jólaglögg Árborgar sem er alltaf haldið í Október. Þar er öllum sem eiga leiki fyrir Árborg boðið og dagskrá allan daginn sem endar svo í Hvíta húsinu um kvöldið. Þar var tekið rokkhlaup núna og við hlupum á miðnætti frá Hvíta Húsinu út á Toyota bílasölu sem er í heildina 500 metrar. Menn á öllum aldri og það ofpeppuðust allir. Það er risa hringtorg sem við þurftum að hlaupa í kringum og það stoppaði bíll þarna og þurfti að bíða á meðan 80 naktir menn hlupu þarna og ég hugsa stundum hver hafi verið í bílnum. Þetta lýsir Árborg svolítið vel,“ sagði Ingimar að lokum.

Ástríðan – Hetjur neðri deildanna er sem fyrr segir nýtt hlaðvarp á Tal sem stýrt er af Sverri Mar Smárasyni sem hefur undanfarin ár stýrt hlaðvarpinu Ástríðan. Þar hefur Sverrir ásamt félögum sínum Óskari Smára og Gylfa Tryggvasyni fjallað um leiki og lið í 2.- og 3.deild karla í fótbolta. Nú ætlar hann í nýrri þáttaröð að taka viðtöl við hetjur úr neðri deildunum sem allir hafa heyrt um en fæstir þekkja almennilega sem leikmenn.

Hægt er að hlusta á Hetjur neðri deildanna á öllum helstu hlaðvarpsveitum.