Við­snúningur í hoppu­kastala­málinu

Dómarinn í héraði hafði áður hafnað kröfu verjenda sakborninga í málinu um að kveða fyrir dóminn tvo matsmenn. Sú niðurstaða var kærð til Landsréttar sem komst að öndverðri niðurstöðu. Verjendurnir vilja skýrari svör varðandi hvernig festa átti kastalann í jörðu og álit varðandi vind í aðdraganda slyssins.

Einar Oddur Sigurðsson, einn verjenda, segir mikilvægt að svara þessum spurningum. Fyrra mat hafi verið að allt of fáir hælar hefðu verið notaðir án þess að tilgreint hefði verið hve marga hæla hefði átt að nota. Því þurfi að svara annars vegar þeirri spurningu hvort kastalinn hafi verið fullnægjandi festur, meðal annars miðað við tilmæli frá framleiðanda.

Segir horft fram hjá upplýsingum frá framleiðanda

Einar Oddur segir upplýsingar liggja fyrir um hvernig standa eigi að því að festa niður kastalann. Þær upplýsingar séu í andstöðu við fyrirliggjandi mat.

„Það er eins og hafi verið horft fram hjá því,“ segir Einar Oddur um fyrra mat fyrir dómi.

Þá beri öllum vitnum saman um að sterk vindhviða hafi komið á horn kastalans þegar hann lyftist upp. Fyrra mat segi að ekki sé hægt að leggja mat á hve sterk hviðan hafi verið eða hve mikinn vind kastalinn eigi að þola. Í leiðbeiningum frá framleiðanda segi hins vegar að kastalinn eigi að þola ákveðinn vindstyrk.

Því þurfi sérfræðing til að meta hvort vindhviðan hafi verið yfir tilteknum mörkum.

Aðalmeðferð seinkar

Fimm eru ákærðir í málinu. Tveir sjálfboðaliðar á vegum íþróttafélagsins KA, sem hafði tekið að sér að útvega starfsmenn til að sinna miðasölu og umsjón með svæðinu, og þrír starfsmenn félagsins sem leigði hoppukastalann út.

Til stóð að aðalmeðferð í málinu færi fram í maí. Einar Oddur á von á því að dómari boði aðila málsins til fyrirtöku á næstunni. Reikna má með því að aðalmeðferð frestist því nokkuð í málinu.

Fimmmenningarnir eru sagðir hafa borið ábyrgð á öryggi barnanna sem voru að leik í hoppukastalanum með einum eða öðrum hætti. Málið er höfðað vegna fjögurra barna sem slösuðust. Tvö börn handleggsbrotnuðu og eitt barn hlaut brot á herðablaði í slysinu. Eitt barnanna, sex ára stúlka, slasaðist alvarlega. Hún varð fyrir miklum heilaáverka sem gerði það að verkum að hún þarf að læra flest, ef ekki allt, upp á nýtt.