Konur berjast við Rússa á öllum vígstöðvum í Úkraínu

Mariia Ionova og Olena Kondrariuk sitja báðar á úkraínska þinginu fyrir flokkinn Evrópsk samstaða og sú síðarnefnda er jafnfram varaforseti þingsins og einn stofnenda Kvennaþings Úkraínu. Þær er hingað komnar til að taka þátt í Kynjaþingi í Veröld - húsi Vigdísar á vegum Kvenréttindafélags Íslands á morgun.

Ionova segir stríðið í Úkraínu hins vegar ekki snúast um stöðu kynjanna heldur baráttu einræðis og lýðræðis.

„Þess vegna tel ég að hlutverk kvenna í þessu stríði sé mjög mikilvægt. Við erum ekki fórnarlömb, ekki bara fórnarlömb, við erum baráttumenn á þingi, í ríkisstjórn og óbreyttir borgarar eru mjög virkir. Við sjáum hvað það hveru mikið við getum gert þegar við stöndum saman og erum skipulögð," segir Ionova.

Í dag áttu hún og Kondrariuk fundi með forsætisráðherra, forseta Alþingis, borgarstjóra og fleiri ráðmönnum og færðu Íslendingum þakkir fyrir margs konar stuðning við Úkraínu. Þær þökkuðu meðal annars fyrir nýlega ályktun Alþingis um að holodomor, hungursneyðin sem Stalín framkallaði í Úkraínu, væri hópmorð.

„Af því að þetta snýst um sögulegt réttlæti en því miður halda Rússar áfram að fremja þjóðarmorð á yfirráðasvæði okkar, gagnvart borgurum okkar. Þetta snýst ekki bara um þjóðarmorð heldur einnig

um vistfræðilega glæpi sem þeir fremja á yfirráðasvæði okkar. Við vekjum einnig athygli á börnunum okkar sem hafa verið flutt með valdi til Rússlands," segir þingkonan.

Úkraína vilji að umheimurinn skilgreini Rússsland sem ríki sems styðji hryðjuverk. Vonandi styðji Ísland einnig aðild Úkraínu að Nato á leiðtogafundi bandalagsins í Vilnius í júlí. Leiðtogafundur Evrópuráðsins í Reykjavík í næstu viku sé einnig mikilvægur.

„Við vitum að þar verða send sterk skilaboð varðandi alþjóðlega stríðsglæpadómstólinn. Ég held að það sé enginn sáttmáli eða reglur alþjóðasamtaka sem Rússar hafa ekki brotið," segir Mariia Ionova