Ó­­væntur vin­­skapur kom Nonna til Hamrén í Noregi - „Gaf okkur steik og rautt á kvöldin“

Nonni hefur meðal annars þjálfað KF, Augna­blik, Elliða, Kára, Hamar og Þrótt Vogum á­samt því að eiga tvö tíma­bil sem þjálfari í Bestu deild kvenna, þá hjá Val og Fylki. 

Jón Aðal­steinn hefur í gegnum tíðina verið dug­legur við að afla sér þekkingar og reynslu annarra þjálfara sem annað hvort eiga lengri feril eða þjálfa á hærra getu­stigi. Hann sagði Sverri meðal annars frá því þegar hann heim­sótti Erik Hamrén, þá­verandi þjálfara Rosen­borgar í Noregi, sem síðar varð lands­liðs­þjálfari Ís­lands.

„Talaði ekki um annað en Erik vin sinn“

Það var Haraldur Hróð­mars­son, sem lék undir stjórn Nonna hjá Hamar 2011-2012, sem opnaði þá um­ræðu í þættinum.

„Við fundum það og hann var alveg opinn með það að hann var hringjandi í þjálfara í efstu deild eins og Rúnar Kristins­son og Heimir Guð­jóns­son. Hann var að spyrja þá út í álit á ein­hverjum málum sem hann var að eiga við og að fylgjast með þjálfun á hæsta getu­stigi.

Það var frægt þegar hann fór til Rosen­borgar að hitta Erik Hamrén. Svo kom hann heim og talaði ekki um annað en Erik vin sinn í mánuð,“ sagði Haraldur um fyrrum þjálfara sinn.

Nonni tók undir þessa um­ræðu og út­skýrði betur hvernig að því kom að hann skyldi heim­sækja þennan topp klúbb með topp þjálfara eins og Erik Hamrén.

„Mig skorti á­kveðinn meistara­flokks­feril og ég sá það alveg þannig ég fór til dæmis mikið til Dan­merkur til fé­laga míns sem bjó þar þá og við heim­sóttum marga klúbba þar. Við fórum til Rosen­borgar fyrir til­stuðlan Eyfa sem var for­maður og fram­kvæmda­stjóri Hamars. Erik og Eyfi eru bestu vinir. 

Sú saga hefur aldrei verið sögð í Ís­lenskum fjöl­miðlum að Eyfi, Erik Hamrén og Eiki Hauks söngvari eru perlu­vinir. Hann gerði það að verkum að við fórum til Rosen­borgar og vorum þar í viku.

Erik Hamrén var þá búinn að á­kveða að taka við sænska lands­liðinu og var að klára tíma­bilið með Rosen­borg. Við fengum að vera á æfinga­svæðinu með honum á daginn og svo var hann að gefa okkur steik og rautt á kvöldin. Vorum á öllum video fundum og fengum bara rosa­legan að­gang að Rosen­borg, allt fyrir til­stuðlan Eyfa,“ sagði Nonni um sína reynslu og hélt á­fram.

„Varðandi Heimi þá vorum við bara svo­lítið að æfa saman í Hress. Vorum þar í spinning að halda okkur í formi. Með Rúnar fékk ég að fara inn á æfingar til hans og Teits Þórðar í tvær vikur. Til þess bara að fá að sjá og læra hvernig lið í efstu deild voru að gera þetta.

Það er enginn sem hringir í þig, þú verður að hringja sjálfur bara,“ sagði Nonni. 

Nonni bað sömu­leiðis Ás­geir Elías­son heitinn um að fá að fylgjast með æfingum hjá honum en hann tók öðru­vísi á móti honum en aðrir.

„Ég bað líka „Geira El“ heitinn um að fá að fylgjast með æfingum hjá honum þegar ég var hjá Úlfunum á sínum tíma. Hann sagði nei komdu bara og æfðu. Þannig ég æfði bara með Þrótti í hálft tíma­bil, spilaði æfinga­leiki og eitt­hvað fyrir Þróttarana. 

Þeir voru að verða vit­lausir á mér enda ekki nægi­lega góður. Þetta var ekta „Geiri El“ og þú getur í­myndað þér hvað maður lærði þar. Það er verið að gera þetta út um allan heim,“ sagði Jón Aðal­steinn að lokum.

Ást­ríðan – Hetjur neðri deildanna er sem fyrr segir nýtt hlað­varp á Tal sem stýrt er af Sverri Mar Smára­syni sem hefur undan­farin ár stýrt hlað­varpinu Ást­ríðan. Þar hefur Sverrir á­samt fé­lögum sínum Óskari Smára og Gylfa Tryggva­syni fjallað um leiki og lið í 2.- og 3.deild karla í fót­bolta.

Nú ætlar hann í nýrri þátta­röð að taka við­töl við hetjur úr neðri deildunum sem allir hafa heyrt um en fæstir þekkja al­menni­lega sem leik­menn eða þjálfara. Hægt er að hlusta á Hetjur neðri deildanna á öllum helstu hlað­varps­veitum.