Á­minnt fyrir að segja frá tíu ára stúlku sem fór í þungunar­­rof í kjöl­far nauðgunar

Bernard var að auki sektuð en má halda áfram störfum.

Ríkissaksóknarinn Todd Rokita, sem er Repúblikani og yfirlýstur andstæðingur þungunarrofs, hefur freistað þess að láta Bernard gjalda fyrir að veita stúlkunni umrædda þjónustu. Þess ber að geta að allir sem sitja í fagráðinu eru útnefndir af ríkisstjóranum, sem einnig er Repúblikani.

Vinnuveitandi Bernard, Indiana University Health, komst að þeirri niðurstöðu að hún hefði ekki brotið gegn siðareglum með viðtalinu, þar sem ekki var hægt að bera kennsl á stúlkuna út frá því sem hún Bernard sagði.

Málið vakti gríðarlega athygli vestanhafs þar sem það átti sér stað skömmu eftir að Hæstiréttur Bandaríkjanna snéri eigin niðurstöðu í Roe gegn Wade. Stúlkan, sem bjó í Ohio, leitaði til Indiana eftir að þungunarrof var bannað eftir sjöttu viku meðgöngu í heimaríki hennar.

Bernard ræddi nafnlaust um málið við blaðamann og vakti umfjöllunin gríðarlega athygli en formaður fagnefndarinnar sem fjallaði um ásakanirnar á hendur Bernard sagði hana góðan lækni og að hún hefði ekki séð fyrir sér að viðtalið færi í jafn víðtæka dreifingu og raun bar vitni.

Rokita hefur fagnað áminningunni en sjálf sagði Bernard fyrir nefndinni að málið væri pólitískt. Hún hefði ekki látið uppi neinar persónuupplýsingar um stúlkuna og menn hefðu aðeins farið að grafast fyrir um hana þegar andstæðingar þungunarrofs héldu því fram að hún væri uppspuni Bernard.

Bernard sagði það skyldu sína sem heilbrigðisstarfsmanns að fræða almenning um mikilvæg mál er vörðuðu lýðheilsu, ekki síst um kvenheilsu þar sem það væri hennar sérsvið. 

Hún steig fram þegar umræða var í gangi um að taka upp svipaðar takmarkanir í Indiana og í Ohio. Þær eru nú orðnar að veruleika, með ákveðnum undanþágum þegar um er að ræða þungun í kjölfar nauðgunar eða sifjaspells.