Nýjar reglur kalla á auka­leik um sæti í efstu deild eftir sáran endi

Spezia og Verona enduðu í 17. og 18. sæti í deildinni, með 31 stig hvort. Þó að Spezia hafi endað með betri markatölu en Verona, og haft betur samtals í innbyrðis leikjum liðanna í vetur, þá er enn óljóst hvort þessara liða fellur niður í B-deildina með Cremonese og Sampdoria.

Það er vegna þess að búið er að endurvekja reglu um umspil þegar tvö lið verða jöfn að stigum í og við fallsæti, eða á toppi deildarinnar. Ef fleiri en tvö lið verða jöfn að stigum í þessum sætum er farið eftir innbyrðis viðureignum til að velja liðin tvö sem spila í umspili.

Spezia var óhemju nálægt því að sleppa við umspilið því liðið virtist ætla að ná í stig gegn Roma í lokaumferðinni í gær. Staðan var 1-1 að loknum venjulegum leiktíma en Paulo Dybala tryggði Roma sigur með marki úr vítaspyrnu, og kom þar með Roma upp fyrir Juventus og í Evrópudeildina.

Verona var sömuleiðis nálægt því að ná í stig gegn AC Milan, í kveðjuleik Zlatans Ibrahimovic, en staðan var 1-1 þar til að Rafael Leao skoraði tvö mörk á síðustu fimm mínútum leiksins.

Á hlutlausum velli og beint í vító ef þess þarf

Leikur Spezia og Verona fer líklega fram næsta sunnudag. Reglum samkvæmt fer leikurinn fram á hlutlausum velli en ekki er búið að velja leikvang þegar þetta er skrifað.

Ef úrslitin verða ekki ráðin eftir níutíu mínútur mun það ráðast í vítaspyrnukeppni hvort að Spezia eða Verona verður í ítölsku A-deildinni á næstu leiktíð.