Segir verð­breytingar eðli­­legar og til marks um mikla sam­­keppni

Í fréttum okkar í gær kom fram að vísbendingar séu um að matvöruverslanir hafi samræmt vöruverð sitt örfáum dögum áður en ný verðgátt var opnuð almenningi.

Verðbreytingar algengar

Framkvæmdastjóri Krónunnar segist fagna gagnsæi en hafnar öllu tali um samráð.

„Þvert á móti þá er þetta til marks um mjög mikla samkeppni á markaði. Það er mjög algengt að við séum að breyta verðum til að gera verið samkeppnishæf og við fylgjumst mjög vel með því sem er í gangi í kringum okkur og erum með virkt verðlagseftirlit þannig í rauninni er ekkert óeðlilegt við það að verðin séu að breytast,“ segir Guðrún Aðalsteinsdóttir, framkvæmdastjóri Krónunnar.

Aðspurð hvort það teljist eðlilegt að verð sé oft nær nákvæmlega það sama í verslununum þremur, segir hún mikilvægt að hafa í huga að verðgáttin sýni einungis verð á tæplega áttatíu vörum sem sé eitt prósent af vöruúrvali Krónunnar.

Sama dag og gáttin fór í loftið lækkaði Krónan verð á jarðarberjum á sama tíma og Nettó hækkaði sitt verð. Eftir breytinguna eru allar verslanir með nokkuð svipað verð á vörunni.

Fréttastofa reyndi að ná tali af forstjóra Samkaupa og rekstrarstjóra Nettó í dag án árangurs. Félagið sendi þó fréttatilkynningu þar sem fram kemur að markmið Nettó sé að bjóða samkeppnishæf verð sem þýði að verð taki stöðugt breytingum.

Ákváðu að jafna verðin við Bónus

Guðrún segir að unnið sé með vikuverð þegar kemur að ávöxtum og grænmeti og því ekki óeðlilegt að verðsveiflur séu á jarðarberjum.

„Þannig það er ekkert óeðlilegt að stórar breytingar séu þar. Með þetta sérstaka tilfelli þá ákváðum við að jafna verðin við Bónus en ég get alveg sagt það að þetta verð endurspeglar ekki gæði vörunnar þannig mér finnst ólíklegt að við náum að halda því til lengri tíma en það er einfaldlega því varan er af þannig gæðum.“

Í skriflegu svari frá forstjóri Samkeppniseftirlitsins kemur fram að þó skynsamlegt sé að skapa neytendum tækifæri til að taka upplýstar ákvarðanir um innkaup þurfi að gæta vel að því að ekki sé verið að skapa keppinautum aukin tækifæri til að samhæfa hegðun sína með auknu aðgengi að upplýsingum um verðlagningu. Samkeppniseftirlitið muni fylgjast vel með framvindunni og meta hvort þörf sé til athugana.