Innlent

Loka gos­stöðvunum snemma vegna slæmrar hegðunar

Árni Sæberg skrifar
Viðbragðsaðilar við gosstöðvarnar eru fámennir.
Viðbragðsaðilar við gosstöðvarnar eru fámennir. Stöð 2/Arnar

Lögreglustjórinn á Suðurnesjum hefur ákveðið að loka aðgengi að gosstöðvunum við Litla-Hrút klukkan 18 í kvöld. „Erfiðlega gekk að hafa stjórn á fólki í gærkvöldi og nú sem oft áður er það tiltölulega fámennur hópur sem skemmir fyrir öllum hinum. Það hefur framangreindar afleiðingar að loka þarf gönguleiðum tímanlega,“ segir í tilkynningu.

Í tilkynningunni segir að þetta sé gert til þess að þurfa ekki að halda úti fjölmennum hópi viðbragðsaðila allan sólarhringinn við að eltast við einstaklinga með lélega dómgreind. Takmarkaður hópur viðbragðsaðila hafi hvorki getu né afl til að leiðbeina og gefa fólki fyrirmæli við þessar aðstæður.

Á landakorti líti svæðið sakleysislega út en margir átti sig engan veginn á vegalengdum eða stærð svæðisins.

Þá verður Vigdísarvallavegi einnig lokað klukkan 18 af öryggisástæðum.

Lokuðu í gærkvöldi 

Í tilkynningu segir að gossvæðinu hafi verið lokað klukkan 23:30 í gærkvöldi þar sem hópur fólks hafi ekki farið að fyrirmælum lögreglu og björgunarsveita um að fara ekki inn á merkt hættusvæði. Gönguleiðum hafi því verið lokað niður við Suðurstrandarveg.

„Sem fyrr þá gengur ekki í öllum tilfellum vel að biðja fólk um að halda sig utan hættusvæðis. Við biðjum því fólk um að haga sér í samræmi við fyrirmæli lögreglu og björgunarsveita og fara ekki inn á merkt hættusvæði.“

Eldgos á Reykjanesskaga Björgunarsveitir Lögreglumál

Mest lesið


Fleiri fréttir

Sjá meira


×

Mest lesið