Lóa boratoríum glæðir gamlar styttur lífi

Íris Hauksdóttir skrifar 9. ágúst 2023 15:24

Listakonan Lóa Hjálmtýsdóttir stendur fyrir spennandi sýningu um þessar mundir.

Lóa Hjálmtýsdóttir, listakona og söngkona hljómsveitarinnar FM Belfast er margt til lista lagt. Á morgun opnar hún listasýningu þar sem hún glæðir lífi í gamlar styttur.

Hugmyndina segir Lóa hafa sprottið þegar hún var barn og sá stytturnar í sjónvarpsskáp í Breiðholti. Mörgum árum síðar fór hún svo að taka eftir sömu styttum í Góða hirðinum og ákvað að sanka þeim að sér án þess þó að vita beinlínis hvað hún hygðist gera við þær.

Gamlar styttur öðlast nýtt líf í meðförum Lóu.aðsend

„Maja systir hjálpaði mér að safna þeim og dag einn kynntist hún konu í Góða hirðinum sem sá Maju vera að bagsa með fulla körfu af styttum. Konan spurði hana hvort hana vantaði Hugsuðinn og nokkrum dögum síðar var ég stödd á heimili í Hafnarfirði hjá ókunnugri konu og gekk út með Hugsuðinn í fanginu.

Lóa stendur fyrir sýningunni Hlið vítis II sem haldin er í Gryfjunni í Ásmundarsal.aðsend

Svo komst ég að því að Hugsuðurinn væri hluti af stærra samhengi í verkinu Hlið vítis og þegar ég sá mynd af því þá tók ég eftir því að upprunalega verkið er eins og risastór sjónvarpsskápur fullur af styttum.“

Tekur fagnandi á móti styttum og leir sem fólk vill losa sig við

Sýningin ber heitið Hlið vítis II og er haldin Gryfjunni í Ásmundarsal fimmtudaginn 10. ágúst frá 19-21. Sjálf hefur Lóa unnið stíft að endurgerð listaverksins La Porte L’enfer eftir franska höggmyndalistamanninn Rodin fyrir opnun sýningarinnar. Opnunin er lokahnykkurinn á fjögurra vikna opinni vinnustofu í Gunnfríðargryfju. Sýningin er styrkt af Myndstef.

Lóa tekur fagnandi á móti leir og styttum sem óska eftir nýju lífi. aðsend

Á meðan vinnustofunni stendur tekur Lóa líka við styttum og leir sem fólk vill losa sig við. Öllum er velkomið að kíkja á listakonunni við störf sín í Gryfjunni á meðan hún vinnur að verkinu. Afraksturinn verður að lokum kynntur þann 10. ágúst.

Hér fyrir neðan má sjá stórskemmtilegt viðtal Snæbjörns Ragnarssonar við Lóu í þættinum Snæbjörn talar við fólk.

Styttur og útilistaverk Menning