Byrjaði allt í dimmum kjallara í Kvennaskólanum

SS 11. ágúst 2023 08:31

Daníel og Kolbeinn skipa dúettinn Sprite Zero Klan en sveitin var stofnuð fyrir nokkrum árum í Kvennaskólanum í Reykjavík.

Keppnin um bestu nýju útgáfuna af SS pylsulaginu hefur staðið yfir í sumar í þættinum Skúrinn á Vísi en kosningu lýkur á miðnætti næsta mánudag. Taktu þátt og kjóstu!

Í vikunni hefur Vísir birt loka viðtölin við keppendurna þrjá sem komust í úrslit. Á miðvikudag svöruðu félagarnir í Sæborg nokkrum spurningum. Í gær tóku Gunnar & Benedikt við og núna eru það strákarnir í Sprite Zero Klan sem eiga sviðsljósið.

Á sama tíma og tilkynnt var hvaða þrír flytjendur kæmust áfram var tilkynnt að Gígja Marín hefði unnið keppnina um besta frumsamda lagið sem ber heitið I know.

Hér má kjósa í Skúrnum um bestu nýju útgáfuna af SS pylsulaginu. Fyrir neðan kosningagluggann má hlusta á nýju útgáfurnar þrjár. Kosningu lýkur á miðnætti mánudaginn 14. ágúst og úrslitin verða tilkynnt í sömu viku.

Sprite Zero Klan var stofnuð í dimmum kjallara í Kvennaskólanum í Reykjavík haustið 2015 að sögn þeirra Daníels og Kolbeins sem skipa sveitina. „Það eru væntanlegar útgáfur núna í haust og alveg fram á vor. Það er „banger season“ fram undan,“ segir Kolbeinn.

Þeir eru sammála um að þátttakan í Skúrnum hafi verið mikil upplifun. „Það hefur verið gaman, þetta er góð keppni og gaman að vera í topp þremur. Alltaf verið að henda einhverjum samningum í okkur samt sem við skiljum ekki, en annars bara ógeðslega gaman,“ bætir Daníel við.