Szoboszlai og Salah á skotskónum í stórsigri Liverpool

Liverpool vann öruggan 3-0 sigur er liðið tók á móti Aston Villa í ensku úrvalsdeildinni í knattspyrnu í dag.

Það var Dominik Szoboszlai sem kom heimamönnum yfir strax á þriðju mínútu með föstu skoti af vítateigslínunni eftir undirbúning frá Trent Alexander-Arnold.

Heimamenn tvöfölduðu svo forystu sína á 22. mínútu þegar Darwin Nunez slapp einn í gegn. Skot Nunez hafnaði hins vegar í stönginni, en þaðan fór hann í Matty Cash sem ætlaði að hreinsa frá og í netið.

Staðan var því 2-0 þegar flautað var til hálfleiks og liðin gengu til búningsherbergja. Mohamed Salah bætti þriðja marki heimamanna við þegar um tíu mínútur voru liðnar af síðari hálflelik eftir stoðsendingu frá Darwin Nunez og þar við sat.

Öruggur 3-0 sigur Liverpool því staðreynd og liðið situr nú í þriðja sæti deildarinnar með tíu stig eftir fjóra leiki, en Aston Villa situr í því ellefta með fjórum stigum minna.

Þá vann Crystal Palace góðan 3-2 sigur gegn Wolves á sama tíma í fjörugum leik þar sem öll mörkin voru skoruð í síðari hálfleik. 

Odsonne Edouard skoraði tvö mörk fyrir Palace og Eberechi Eze eitt, en Hwang Hee-chan og Matheus Cunha sáu um markaskorun Úlfanna.