Tobba Marinós til liðs við Lemon

Tobba segist alsæl með samstarfið. „Ég er ekkert eðlilega spennt yfir því að nú verði loksins hægt að nálgast almennilegt gúmmelaði hér á landi án viðbætts sykurs. Lemon hefur vaxið ört upp á síðkastið og það eru mörg spennandi verkefni á teikniborðinu og fólkið í brúnni þar er framúrskarandi - það er ekki síður mikilvægt.” 

Orkubombur stútfullar af vítamínum

Sjálf lagði Tobba safapressunni í bili eftir að hafa þurft að fara í aðgerð á hendi eftir langar vaktir við safapressun. Unnur Guðríður Indriðadóttir, markaðsstjóri Lemon segir markaðsteymi sitt ekki hafa þurft að hugsa sig lengi um þegar til tals kom að hefja samstarf við Tobbu. 

„Lemon er stað sem vill huga að heilsunni og bjóða upp á góða næringu. Okkur fannst vörurnar hennar Tobbu smellpassa inn í vöruúrvalið okkar. Ég er sannfærð um að viðskiptavinir okkar eigi eftir að gleðast yfir þessari viðbót.” Að sögn Unnar bætast við margskonar orkubombur, stútfullar af vítamínum og hollustu, í vöruúrvalið hjá Lemon. „Það er einmitt það sem kroppurinn þarfnast núna. Fyrst um sinn verður boðið upp á detox-pakka Tobbu og sellerísafann fræga sem Tobba hefur dásamað síðustu ár.”

Föndur og sumarsukk 

„Nú get ég loksins einbeitt mér að vöruþróun,” segir Tobba sjálf og heldur áfram. „Draumurinn um að fólk geti borðað betur á viðráðanlegu verði og án þess að vera alltaf með hnetur í bleyti og föndrandi fram á nótt er því rætast. 

Einföld hráefni og engin aukaefni eða sykur eru mín mantra og Lemon fólkið góða eru fullkomnir samstarfsaðilar í því. Nú er loksins komið íslenskt sellerí frá Höllu bónda en hún er eini selleríræktandinn á Íslandi, svo það er himnasending að geta boðið upp á ferskt sellerí frá henni. 

Stefnir á sætan bita á seðilinn sem fyrst

Með Lemon í liði sé ég fram á að anna loks eftirspurn og öll ættu að geta hent sér í selleríhreinsun til að skola sumarsukkið út. Það er ótrúlegt hvað eftirspurnin eftir 100% hreinum sellerísafa er mikil - eða ótrúlegt uns þú hefur prófað. Þá meikar þetta allt sens. Allavega hefur þetta gulgræna sull breytt bæði lífi mínu og mittismáli.” 

Myndarlegur og væntanlegur Kaffisjeikinn - líklega mest myndaði sjeik landsins - er einnig væntanlegur aftur í maga og á myndir landsmanna. „Það þarf ekkert að kynna þetta krútt. Án alls viðbætts sykurs og bragðefna. Bara hnausþykkur sjeik sem fær kasólétta konu til þess að ganga í úrhelli úr Fossvoginum út á Granda - sönn saga,” segir Tobba sem stefnir á að koma með sætan bita á matseðil Lemon sem fyrst. 

„Í komandi lægðum er algjörlega nauðsynlegt að eiga sæta bita sem fara vel með líkama og sál. Allavega þurfti ég á þeim að halda þegar ég horfði á þá appelsínugulu mölva sólblómin og eldliljurnar í garðinum sem ég hef nostrað við í allt sumar.”