Ítrekar að Manchester United sé ekki í krísu

Manchester United mátti þola 1-3 tap gegn Brighton & Hove Albion á heimavelli sínum, Old Trafford í gær og liðið hefur nú tapað þremur af fyrstu fimm leikjum tímabilsins. United situr í 13. sæti deildarinnar með sex stig og þrátt fyrir að enn sé stutt liðið á tímabilið er liðið nú þegar níu stigum á eftir toppliði Manchester City.

Stuðningsmenn United bauluðu á liðið eftir tapið í gær og hafa greinilega áhyggjur af stöðu mála hjá félaginu. Þetta er versta byrjun Manchester United í deildarkeppni í 34 ár, en þrátt fyrir það segir Ten Hag að félagið sé ekki í krísu.

„Við verðum að standa saman og halda okkur við planið og reglurnar sem við höfum sett okkur og þá munum við snúa genginu við,“ sagði Ten Hag.

„Auðvitað fer þetta slæma gengi í taugarnar á mér, en ég þarf að horfa á það hvernig við spilum. Þetta snýst um karakter og nú þurfum við að sjá hversu sterkir við erum og hvernig okkur gengur að standa saman. Leikmenn þurfa að rísa upp og sýna karakter af því að við höfum sýnt það í öllum leikjunum, sérstaklega í dag [í gær] og gegn Arsenal og Nottingham Forest, að við getum spilað vel og skapað færi.“