Markvörðurinn skoraði og bjargaði stigi fyrir Lazio

Það voru gestirnir frá Madrídarborg sem tóku forystuna á 29. mínútu í heldur bragðdaufum leik með marki frá Pablo Barrios.

Staðan var því 0-1 í hálfleik og lengst af leit út fyrir að mark Barrios yrði eina mark leiksins. Heimamenn fengu þó hornspyrnu seint í uppbótartíma og hrúguðu öllum sínum leikmönnum inn í teig Madrídinga. Boltinn barst aftur út úr teig eftir hornspyrnuna, en Luis Alberto gaf boltann fyrir á nýjan leik þegar uppbótartíminn var rúmlega liðinn.

Markvörðurinn Ivan Provedel átti þá frábært hlaup inni í teig og stangaði boltann í netið með seinustu snertingu leiksins. Niðurstaðan því vægast sagt dramatískt 1-1 jafntefli og liðin skipta stigunum á milli sín.

Úrslit kvöldsins