Sækir um skilnað frá Danny Masterson

Atli Ísleifsson skrifar 20. september 2023 07:50

Bijou Phillips og Danny Masterson gegnu í hjónaband árið 2011. Getty

Bandaríska leikkonan Bijou Phillips hefur sótt um skilnað frá leikaranum Danny Masterson. Masterson var fyrir tveimur vikum dæmdur í þrjátíu ára fangelsi eftir að hafa verið sakfelldur af ákæru um tvær nauðganir.

Bandarískir fjölmiðlar greina frá því að hin 43 ára Phillips hafi í dómsgöngum vísað til „ósættanlegs ágreinings“, en þau Masterson hafa verið gift í tólf ár og eiga saman eitt barn.

Phillips var viðstödd þegar dómari greindi frá ákvörðun sinni um þrjátíu ára fangelsisdóm yfir hinum 47 ára Masterson.

Peter Lauzon, lögmaður Phillips, segir skjólstæðing sinn fyrst og fremst vera að gæta hagsmuna barns síns. Hann sagði einnig að Masterson hafi „ávallt verið til staðar fyrir Phillips þegar hún hafi gengið í gegnum erfiða tíma“ og að hann væri „yndislegur faðir“. Þá segir hann Phillips vona að fólk virði einkalíf fjölskyldunnar á þessum erfiðu tímu.

Í dómsgögnum fer Phillips fram á fullt forræði yfir barni þeirra Masterson. Þau trúlofuðust árið 2009 og gengu í hjónaband á Írlandi tveimur árum síðar.

Mál Masterson kom upp árið 2020 þegar þrjár konur stigu fram og sökuðu hann um nauðganir sem áttu að hafa átt sér stað 2001 og 2003. Masterson var sakfelldur fyrir tvær nauðganir árið 2003 en ekki þá sem átti að hafa átt sér stað 2001. Konurnar sögðu Masterson hafa byrlað þeim ólyfjan og nauðgað þeim.

Masterson er þekktastur fyrir hlutverk sitt sem Steven Hyde í gamanþáttunum That 70‘s Show sem framleiddir voru á árunum 1998 til 2006.

Mál Danny Masterson Hollywood

Tengdar fréttir

Umdeild afsökunarbeiðni vegna enn umdeildari bréfa

Leikarahjónin Mila Kunis og Ashton Kutcher hafa sætt harðri gagnrýni nú um helgina eftir að meðmælabréf sem þau skrifuðu um leikarann Danny Masterson voru birt. Masterson var á fimmtudag dæmdur í þrjátíu ára fangelsi fyrir nauðgun.

10. september 2023 23:00

Masterson dæmdur í þrjátíu ára fangelsi fyrir nauðgun

Danny Masterson, leikari sem er þekktastur fyrir hlutverk sitt í That ´70 Show, hefur verið dæmdur í þrjátíu ára fangelsi. Masterson var sakfelldur í vor fyrir að nauðga tveimur konum á árum áður.

7. september 2023 19:10

„That 70s Show“ leikari dæmdur fyrir nauðgun

Leikarinn Danny Masterson, sem er hvað þekktastur fyrir að leika í þáttunum That ’70s Show, sem nutu mikilla vinsælda um og eftir aldarmótin síðustu, hefur verið sakfelldur fyrir að nauðga tveimur konum. Kviðdómendur komust ekki að niðurstöðu varðandi þriðju nauðgunina sem hann var ákærður fyrir.

31. maí 2023 22:16