Ólafur fetar ó­troðnar slóðir í Kú­veit: „Til­­­boð sem ekki margir myndu segja nei við“

„Í gegnum árin hef ég verið með nokkra um­boðs­menn sama hafa verið að reyna koma mér út í at­vinnu­mennsku. Ég hef fengið fullt af til­boðum til mín. Ekkert sem mér hefur litist á. En núna kom bara mjög ó­vænt til­boð sem ég held að ekki margir myndu segja nei við,“ segir Ólafur Brim.

„Þetta er bara frá­bært tæki­færi fyrir mig. Bæði sem hand­bolta­mann og líka sem mann­eskju. Að fá að þróast og eflast, kynnast svona gjör­ó­líkri menningu. Öðru­vísi siðum.“

Það hefur lengi verið draumur Ólafs að halda út í at­vinnu­mennsku. Nú rætist sá draumur.

„Það er alveg frá­bært að þessi draumur sé að verða að veru­leika.“

Til­boð Al-Yar­mouk heillaði Ólaf upp úr skónum. En hvað er það við til­boðið sem er svo heillandi?

„Það halda mjög margir að hand­boltinn þarna í Kú­veit sé ekkert rosa­lega góður en þetta er bara fínasti hand­bolti. Hann er villtur og mjög hraður. Fjár­hags­lega hliðin á þessu er líka mjög góð, eins og fólk heldur líka. Þetta eru bara tvær mjög góðar á­stæður fyrir mig til þess að stökkva á þetta tæki­færi.“

Ólafur er upp­alinn hjá Val en hefur einnig leikið með liðum Fram og Gróttu hér á landi. Hann samdi á nýjan leik við Gróttu í sumar og dvelur því ekki lengi hjá fé­laginu. Hann segir þjálfara liðsins, Róbert Gunnars­son, sýna þessari ævin­týra­þrá sinni skilning.

„Ég og Robbi erum náttúru­lega fínir fé­lagar. Hann sagði við mig að hann væri svekktur þjálfunar­lega séð en sam­gleðst mér. Við skildum því sáttir, sem vinir.“

En við hverju ertu að búast þarna úti í Kú­veit?

„Þegar að stórt er spurt. Það er alla­vegana mjög heitt þarna úti. Ég bara veit ekki alveg við hverju ég á að búast. Bara ein­hverju góðu ævin­týri.“