Utan­ríkis­ráðu­neytið birtir tíma­línuna

Í tilkynningu frá utanríkisráðuneytinu segir að miðvikudaginn 25. október hafi frumdrögum að ályktun Jórdaníu, sem er tillagan sem Ísland ákvað að greiða ekki atkvæði með, verið dreift til aðildarríkja Sameinuðu þjóðanna. Hana hafi utanríkisráðuneytið fengið um hádegi - eða klukkan fimm að íslenskum tíma. Afstaða „líkt þenkjandi ríkja“ hafi ekki legið fyrir en gert hafi verið ráð fyrir því að textinn tæki mögulega breytingum og að breytingartillögur yrðu lagðar fram. 

Ákvörðun utanríkisráðherra lá fyrir rúmlega fimm

Breytingartillaga var lögð fram og það gerðu Kanadamenn. Í stuttu máli fól breytingartillagan í sér að meiri þungi var lagður í að fordæma árásir Hamas-liða. Fulltrúar Sjálfstæðisflokks, sem stýra utanríkisráðuneytinu, segja að Ísland hefði greitt atkvæði með tillögunni, ef breytingartillagan hefði verið samþykkt. Það hefðu Bandaríkjamenn einnig gert, en þeir greiddu að lokum atkvæði á móti upphaflegu tillögu Jórdaníu, sem 120 ríki samþykktu. 45 sátu hjá og 14 greiddu atkvæði á móti.

„Að morgni fimmtudagsins 26. október hófst neyðarumræða allsherjarþingsins. Síðdegis bárust uppfærð drög að ályktun Jórdaníu. Hún var send til utanríkisráðuneytisins kl. 20 að íslenskum tíma. Síðar um kvöldið barst fastanefnd breytingartillaga Kanada. Í upphafi dags föstudaginn 27. október að staðartíma, eða um miðjan dag á íslenskum tíma, lá fyrir að ekki yrðu frekari breytingar á tillögu Jórdaníu og voru breytingartillaga Kanada og tillaga Jórdaníu sendar utanríkisráðuneytinu kl. 13:20 að íslenskum tíma,“ segir enn fremur í tilkynningunni.

Í kjölfarið hafi efni verið tekið saman til handa utanríkisráðherra, þar með talið afstaða annarra ríkja, og honum send gögn klukkan 15:44. Ákvörðun ráðherra lá fyrir klukkan 17:12 og var þá unnið að lokadrögum atkvæðaskýringar.

Sjá einnig: Bjarni segir ráðuneyti Katrínar hafa átt að vita allt um málið

Forsætisráðuneytið fékk upplýsingar einum og hálfum tíma síðar

„Forsætisráðuneytið var upplýst óformlega um afstöðu Íslands kl. 18:17 og voru upplýsingar um afstöðu utanríkisráðherra, gögn, atkvæðaskýringar og texti ályktunarinnar, send ráðuneytinu kl. 18:41. Fundurinn í allsherjarþinginu hófst klukkan 19 að íslenskum tíma, en atkvæðagreiðslan um sjálfa ályktunina fór fram kl. 19:49. Lokadrög að ályktun Jórdaníu og tillaga Kanada lágu ekki fyrir í endanlegri mynd þegar ríkisstjórnarfundur fór fram þann dag. Það er ekki venja fyrir samráði ráðuneytanna um einstakar ályktanir allsherjarþingsins.“  

Utanríkisráðuneytið segir mestu máli skipta að samstaða sé um afstöðuna eins og hún er sett fram í atkvæðaskýringu fastanefndar. Íslensk stjórnvöld „munu áfram beita sér fyrir tafarlausu mannúðarhléi, greiðum aðgangi fyrir mannúðaraðstoð og nauðþurftir, að komið verði á friði og byggt verði á tveggja ríkja lausninni.“

Breytingartillagan bætt „nauðsynlegu samhengi“ við ályktunina

Í skýringum Íslands að atkvæðagreiðslu lokinni segir að fulltrúum landsins hafi þótt miður að „ekki hafi náðst samstaða“ um ályktun um að bregðast við alvarlegri stöðu mannúðarmála.

„Ísland studdi breytingartillögu Kanada sem hefði bætt nauðsynlegu samhengi og jafnvægi við ályktunina. Ísland harmar að sú tillaga hafi ekki fengið brautargengi. Án þeirra nauðsynlegu þátta sem tillaga Kanada tók til ákvað Ísland að sitja hjá við ályktunina sem Jórdanía lagði fram, þrátt fyrir að styðja marga meginþætti hennar, einkum hvað mannúðarmál varðar.“

Ísland taki undir ákall um mannúðarhlé og að vernda verði almenna borgara. Ísland harmi gríðarlegar þjáningar saklausra borgara og þeirra sem týnt hafi lífi.

„Við höfum áhyggjur af áhrifum brottflutnings fjölda almennra borgara á Gaza. Við verðum að koma í veg fyrir frekari stigmögnun, vegna Ísraelsmanna, Palestínumanna og þessa heimshluta. Þetta linnulausa ofbeldi kyndir undir hatur, gyðingahatur, íslamófóbíu og kynþáttafordóma um allan heim,“ segir í skýringum Íslands.

Að lokum er talað fyrir tveggja ríkja lausninni þar sem Ísrael og Palestína geti búið hlið við hlið í friði og öryggi við gagnkvæma viðurkenningu.

Hér er hægt að lesa skýringar Íslands að atkvæðagreiðslu lokinni í heild sinni.