Diljá skoraði tvö í sigri gegn Anderlecht

Fyrsta markið kom strax á 14. mínútu eftir góða fyrirgjöf frá Marie Detruyer, Diljá lúrði þar á fjærstönginni og kom boltanum örugglega yfir línuna. Seinna markið kom svo í upphafi seinni hálfleiks eftir háa sendingu inn fyrir vörn Anderlecht, Diljá varð fyrst í kapphlaupinu um boltann, gerði vel að halda varnarmanninum frá sér og skaut skoppandi bolta framhjá markverðinum. 

Anderlecht minnkuðu muninn skömmu síðar en Nikee Van Dijk skoraði þriðja mark Leuven og sigldi sigrinum heim á 66. mínútu. 

Leuven er enn ósigrað og hefur átta stiga forskot í efsta sæti deildarinnar, með 22 stig eftir átta leiki. Diljá er markahæst í deildinni með átta mörk en hún hefur aðeins tekið þátt í fimm leikjum á tímabilinu.