Ashley Judd refsað fyrir að vitna gegn Weinstein

Ashley Judd á glæsilegan feril í kvikmyndum og sjónvarpi en hún er einnig mjög virkur aðgerðasinni varðandi rétt kvenna til fóstureyðinga og fleira og er virk innan Demókrataflokksins í Bandaríkjunum. Hún var meðal gesta á sjötta Heimsþingi kvenleiðtoga í Hörpu á mánudag og þriðjudag þar sem hún flutti sláandi erindi. Auk þess tók hún þátt í umræðum á þinginu og flutti erindi við Háskóla Íslands.

„Ég man fyrst eftir að hafa verið misnotuð af karlmanni þegar ég var sjö ára og fór strax til tveggja fullorðinna og sagði frá því sem hafi verið gert við mig.Veistu hvað þau sögðu, Guði sé lof að hlutirnir eru öðruvísi í dag; Hann er góður gamall maður. Þetta er ekki það sem hann meinti,“ sagði Judd í erindi sínu á heimsþinginu.

Hún segist lengi hafa ætlað sér að koma til Íslands og taldi rétt að gera loksins alvöru úr því eftir að hafa flogið magsinnis yfir landið þegar henni hafi verið boðið að koma á heimsþingið og flytja erindi við Háskóla Íslands.

Judd hefur leikið í um fjörutíu kvikmyndum og á annan tug sjónvarpsmynda og hlotið fyrir það fjölda viðurkenninga. Það vakti því mikla athygli þegar hún kom fyrst kvenna fram undir nafni og sakaði kvikmyndaframleiðandann Harvey Weinstein um kynferðislega áreitni.

„Ég hef verið kynferðislega áreitt svo oft í Hollywood að listinn er orðinn langur. Til að mynda af framleiðanda sem flaug inn fyrir einn dag, hann var fjármálamaður, sem beinlínis sagði mér að hann hefði átt að nauðga mér þegar hann hafði tækifæri til þess þegar ég var yngri og hafði ekki komist til áhrifa,“ segir Judd.

Henni væri enn refsað með því að ganga fram hjá henni við val á leikkonum í kvikmyndir eftir vitnisburðinn gegn Weinstein. En sem betur fer hafi Me too byltingin kallað fram breytingar í kvikmyndaheiminum.

Þannig væri ekki lengur ásættanlegt að konur ættu fundi með framleiðendum og leikstjórum á hótelherbergjum. Þær ættu nú einnig rétt á að hafa fulltrúa með sér í leikprufum.

„Þetta er kerfi og bergmálshellir þar sem karlmenn kalla ekki aðra karlmenn til ábyrgðar. Þannig að persónur eins og Harvey Weinstein geta athafnað sig án þess að vera dregnir til ábyrgðar. Vegna þess að enginn var til staðar til að trufla þetta feðraveldis ofbeldi. En það hefur breyst ídag. Við konur stöndum meira saman núna. Við deilum upplýsingum, höfum fyrirkomulag sem við köllum Hvíslaranet sem sendir út skilaboð eins og gættu þín á þessum gaur,“ segir Judd.

Hér fyrir neðan má sjá viðtalið við Ashley Judd í heild sinni: