Lifði af dauðadýfu úr yfir fjöru­tíu metra hæð

Dýfuna hjá Stornes má sjá hér að neðan en til þess að uppfylla kröfur um „dauðadýfu“ þurfa menn að stökkva með magann á undan og útréttar hendur. Þeir lenda svo í vatninu annað hvort eins og „fallbyssukúla“ (e. cannonball) eða skjóta fótum og höndum niður fyrir maga (e. pike) rétt fyrir lendingu, eins og Stornes gerði.

Norski ríkismiðillinn NRK fjallar um heimsmet Stornes og segir hann hafa bætt met Frakkanna Come Girardot og Lucien Charlon sem höfðu látið sig falla úr 36,5 metra hæð. Fyrir tveimur árum setti Stornes metið þegar hann hoppaði niður 31 metra.

„Ég vildi verða sá fyrsti í heiminum til að ná yfir 40 metra. Svo er ég bara þannig maður að ég vil hella mér í hlutina, og gera hluti sem eru svolítið áhættusamir. Það fær mig til að finnast ég vera á lífi,“ segir Stornes í samtali við NRK.

„Þetta er bara lífshættulegt,“ segir Paul Rigault sem stendur á bakvið Døds Federation, samtök tileinkuð dauðadýfingum.

„Ég þurfti að leggjast niður. Í fyrsta lagi er hæðin sjúklega mikil og svo velti ég því líka fyrir mér hvernig þetta muni enda,“ segir Rigault sem NRK segir að hafi um árabil verið andlit íþróttarinnar út á við.

„Þegar 20 metra múrinn var rofinn þá hélt ég að þetta væri búið. En þetta þýðir að í rauninni eru engin takmörk,“ segir Rigault.

Stornes hefur helst trú á því að Girardot reyni að slá metið en er samt óviss um að Frakkinn reyni við það.

„Ef hann gerir það þá verð ég fyrstur manna til að koma og klappa fyrir honum. Ég óttast meira að missa góðan vin en að missa heimsmetið.“