Enn fjölgar Bæjarins beztu á flug­vellinum

Pylsurnar hafa í lengri tíma verið vinsæll áfangastaður ferðamanna á Íslandi eins og sést hefur í löngum röðum við pylsuvagninn í miðbæ Reykjavíkur.

Fyrirtækið opnaði útibú í verslun 10-11 í komusal Keflavíkurflugvallar fyrir ekki margt löngu. Í sumar bættist við pylsuvagn á biðsvæði í suðurbyggingu þar sem farþegar á leið til Bretlands, Bandaríkjanna og annarra landa utan Schengen fara um.

Sá pylsuvagn er í svokölluðu pop-up rekstrarrými sem Isavia auglýsti eftir aðilum til að reka veitingasölu í síðasta vetur.

„Stór hluti þeirra sem fara um biðsvæðið eru tengifarþegar sem dvelja að meðaltali aðeins um klukkustund í flugstöðinni. Því var lögð rík áhersla á afgreiðsluhraða við val á veitingaaðila fyrir pop-up rýmið,“ sagði á vef Isavia í júlí.

Þriðji pylsuvagninn er staðsettur við vegabréfaeftirlitið hjá farþegum til landa utan Schengen, nærri Saga Lounge hjá farþegum Icelandair sem hafa viðeigandi aðgangskort.

„Við viljum að gestir Keflavíkurflugvallar finni fyrir og upplifi Ísland þegar þeir eru þar og það er fátt íslenskara en Bæjarins bezstu pylsur. Hróður Bæjarins beztu hefur borist víða og því gleður það okkur að geta boðið gestum vallarins upp á hinar margrómuðu pylsur þeirra,“ sagði Gunnhildur Erla Vilbergsdóttir deildarstjóri verslana og veitinga hjá Isavia í sumar.

Pylsuvagninn góðkunni hóf fyrst rekstur árið 1937 í miðborg Reykjavíkur. Síðan þá hafa Bæjarins beztu boðið höfuðborgarbúum og nærsveitamönnum upp á sínar víðfrægu pylsur en í dag eru staðirnir orðnir ellefu talsins; Sjö staðir á höfuðborgarsvæðinu og fjórir á Suðurnesjum að nýja staðnum meðtöldum.