Falið að gera Reykja­vík að­­gengi­­legri

Þetta kemur fram á vef Reykjavíkurborgar. Þar segir að Bragi þekki vel til hjá borginni en hann var áður á umhverfis- og skipulagssviði, fyrst hjá skipulagsfulltrúa og svo á skrifstofu framkvæmda og viðhalds. Hann hefur nú yfirumsjón með aðgengismálum í fasteignum borgarinnar og í borgarlandinu.

Fram kemur að markmið aðgengisstefnu Reykjavíkurborgar 2022-2030 sé að borgin sé aðgengileg öllum íbúum og gestum hennar og hafi aðgengisfulltrúi Reykjavíkurborgar því nú verið ráðinn til starfa.

„Aðgengisstefna Reykjavíkurborgar byggir á hugmyndafræði um algilda hönnun, bæði hvað varðar aðgengi að byggingum og borgarrýmum, og einnig aðgengi að upplýsingum, þjónustu og stuðningi.

Verkefni aðgengisfulltrúa eru margvísleg, s.s. að taka við ábendingum um úrbætur, veita ráðleggingar varðandi útfærslu lausna, vera í samskiptum við verktaka og hagsmunaðila vegna framkvæmda, gera aðgengisúttektir og hafa umsjón með verkefnum sem snerta aðgengismál með einum eða öðrum hætti. Í hnotskurn að tryggja algilda hönnun við allar framkvæmdir borgarinnar.

Aðgengisfulltrúi situr fundi aðgengis- og samráðsnefndar fatlaðs fólks í Reykjavík og framfylgir aðgerðum sem settar eru fram í aðgengisstefnunni,“ segir á vef borgarinnar.

Leiðarljós aðgengisstefnunnar

• Að innleiða samning Sameinuðu þjóðanna um réttindi fatlaðs fólks og hugmyndafræði um sjálfstætt líf og algilda hönnun
• Að einfalt sé fyrir borgarbúa að afla upplýsinga um rétt sinn til þjónustu
• Að borgin eigi frumkvæði að því að bjóða fólki þá þjónustu sem það á rétt á
• Að fólk upplifi öryggi og þægilegt aðgengi í mannvirkjum og innan borgarlandsins
• Að viðburði borgarinnar séu fyrir öll og mæti fjölbreyttum þörfum
• Að umhverfi og þjónusta geri ráð fyrir fjölbreyttri færni og ólíkum einstaklingum en meginregla í allri þjónustu og umhverfi borgarinnar sé ein leið fyrir öll
• Að allir borgarbúar hafi jafnan rétt til þátttöku og upplifi sig sem hluta af samfélaginu
• Að allir íbúar fái nauðsynlegan stuðning til að geta sótt og nýtt þjónustu
• Að haft sé samráð við fatlað fólk og hagsmunasamtök varðandi öll málefni sem varða hagsmuni þess