Hæg­fara vaxtalækkunarferli gæti hafist á miðju ári

Þetta er meðal þess sem fram kemur í þjóðhagsspá bankans sem birt hefur verið á vef bankans. Þar segir að eftir kraftmikinn hagvaxtarkipp árin 2021 til 2022 hafi tekið að hægja á vaxtartaktinum á síðasta ári.

Áætlar greiningardeild bankans að hagvöxtur hafi verið 3,0 prósent á árinu 2023. Árið 2025 hljóðar spáin upp á 2,6 prósent hagvöxt og 2,9 prósent árið 2026.

Vaxtahækkunarferli líklega lokið

Þá segir í spánni að vatnaskilin í hagkerfinu frá örum vexti innlendrar eftirspurnar til samdráttar endurspeglist í bata á utanríkisviðskiptum.

Hagfelldari utanríkisviðskipti ásamt öðrum þáttum renna stoðum undan gengi krónu. Í spánni er gert ráð fyrir að krónan verði um það bil 7-8 prósent hærra í lok spátímans en hún var í árslok 2023.

Verðbólga er tekin að hjaðna eftir verðbólguskot síðustu missera. Greiningardeild bankans segir að helsta ástæðan sé sú að íbúðamarkaður sé í betra jafnvægi og verðlag erlendis stöðugra.

Það dragi hægt og sígandi úr spennu á vinnumarkaði og kaupmáttur launa mun aukast samhliða hjöðnun verðbólgunnar. Þrálát verðbólga kallar á talsvert aðhald Seðlabankans og er útlit fyrir að stýrivextir verði áfram háir næstu misserin. Vaxtahækkunarferlinu er þó líklega lokið að mati bankans og hægfara vaxtalækkunarferli gæti hafist um mitt ár 2024 að því gefnu að verðbólga þróist í takti við spá Greiningar.